JSST kelajakdagi pandemiyalardan himoyalanish rejasini taqdim etadi

Jahon sog‘liqni saqlash tashkilotiga (JSST) a’zo davlatlar uch yildan ortiq davom etgan muzokaralardan keyin dunyoni kelajakdagi pandemiyalarga tayyorlash to‘g‘risidagi kelishuv loyihasini imzoladi. JSST matbuot xizmatining ma’lum qilishicha, hujjat COVID-19’dan keyin yangi patogenlardan himoyani kuchaytirish bo‘yicha huquqiy majburiyatga ega.

JSSTga a’zo barcha davlatlarga ma’qul keladigan hujjatni tayyorlash uchun 13 raunddan iborat uchrashuvlar o‘tkazildi, ularning to‘qqiztasi uzaytirildi, shuningdek, ko‘plab norasmiy uchrashuv va muzokaralar ham tashkil etildi.

Jahon sog‘liqni saqlash tashkiloti rahbari Tedros Gebreyyesusning so‘zlariga ko‘ra, «bugun Jyenevada dunyo davlatlari tarix yaratdi».

Hujjat pandemiyalar davrida davlatlarning harakatlarini muvofiqlashtirish bo‘yicha barcha zarur choralarni, jumladan, dori-darmonlardan foydalanish imkoniyatini ta’minlash, keng qamrovli tadqiqotlar o‘tkazish, sog‘liqni saqlash sohasi mutaxassislarini tayyorlash, favqulodda vaziyatlarda kadrlar resurslarini safarbar etish va boshqa ko‘plab choralarni nazarda tutadi.

May oyida ushbu bitim loyihasi JSSTning oliy rahbarlik organi — Jahon sog‘liqni saqlash assambleyasi tomonidan ko‘rib chiqiladi.

Avvalroq JSST rahbari yangi pandemiya dunyoda hatto «ertaga» boshlanishi mumkinligi haqida gapirgandi. Gebreyyesusga ko‘ra, unga qarshi samarali kurash olib borish uchun jahon mamlakatlari tegishli xalqaro kelishuv tuzishi kerak.