Rossiya va Ukraina bir-biriga dronlar bilan hujum qildi

Rossiya va Ukraina armiyalari 16 aprel, chorshanbaga o‘tar kechasi uchuvchisiz uchoqlar bilan bir-birining hududlariga hujum qildi. Ukraina harbiy-havo kuchlari ma’lumotlariga ko‘ra, 16 aprelga o‘tar kechasi Rossiyaning uchuvchisiz uchoqlari Odessa, shuningdek, Kiyev, Poltava va Sumi viloyatlari tomon yo‘l olgan.

Ayni paytda eng katta vayronagarchilik Odessada qayd etilgan. Mahalliy hududiy harbiy ma’muriyat rahbari Oleg Kiper Telegramʼda turar joy binosidagi yong‘in va fuqarolik infratuzilmasiga yetkazilgan zarar haqida ma’lum qildi. Odessa meri Gennadiy Truxanov turar joy binolari va omborlarga yetkazilgan zarar haqida yozgan.

Truxanovning so‘zlariga ko‘ra, qurbonlar yo‘q. Ukraina Favqulodda vaziyatlar xizmati uch kishi jarohat olganini ma’lum qildi.

Poltava viloyati ma’muriyati uchuvchisiz uchoq hujumi oqibatida elektr uzatish liniyalariga zarar yetkazilganini ma’lum qildi. Ikkita aholi punkti elektr energiyasiz qoldi.

Rossiya Mudofaa vazirligi ma’lumotlariga ko‘ra, bir kecha-kunduzda Belgorod, Voronej, Kursk, Lipetsk, Moskva viloyatlari, shuningdek, Qrim ustida Ukrainaning jami 26 ta uchuvchisiz uchoqlari urib tushirilgan. Mahalliy hukumat bu hududlarda vayronagarchilik va qurbonlar haqida xabar bermadi.