Toshkentda “Yashil iqtisodiyot” mavzusida xalqaro konferensiya bo‘lib o‘tdi

Ushbu tadbir O‘zbekiston Respublikasida 2025 yil — Atrof-muhitni muhofaza qilish va yashil iqtisodiyot yili deb e’lon qilingan Davlat dasturi doirasida tashkil etildi.

Tadbirning asosiy maqsadi — barqaror iqtisodiy rivojlanish masalalari bo‘yicha xalqaro tajribani o‘rganish, dolzarb yechimlarni muhokama qilish va professional muloqot maydoni yaratishdan iborat bo‘ldi.

Konferensiyada dunyoning turli mamlakatlaridan kelgan ekspertlar, moliyaviy tashkilotlar va tadqiqot markazlari vakillari ishtirok etdi. Ishtirokchilar orasida Jahon banki, Osiyo va Yevropa tiklanish va taraqqiyot banklari, Fransiyaning Taraqqiyot agentligi (AFD), Yashil o‘sish bo‘yicha Global institut (GGGI), shuningdek, xalqaro reyting agentligi Fitch Ratings, xalqaro audit va konsalting kompaniyasi PricewaterhouseCoopers (PwC) hamda sifat va xavfsizlik standartlarini baholash bo‘yicha xizmat ko‘rsatuvchi Bureau Veritas kompaniyasi kabi tashkilotlar ham ishtirok etdi.

Konferensiya doirasida iqlim va yashil moliya, aylanma iqtisodiyot, qayta tiklanuvchi energetika kabi masalalar bilan birga, korporativ ijtimoiy javobgarlik, atrof-muhitga ta’sirni baholash, ishlab chiqarishda shaffoflik va mas’uliyatni ta’minlashga qaratilgan xalqaro tamoyillar (ESG) to‘g‘risida ham fikr almashildi. Shuningdek, mahsulot va xizmatlarning sifat, xavfsizlik hamda ekologik talablarga muvofiqligini tasdiqlaydigan (ISO) tizimi doirasidagi standartlarni joriy etish borasida xalqaro tajribalar taqdim etildi.