4 oyda 8 445 ta mast holda mashina boshqarish holati aniqlandi – YHXX

2025 yilning yanvar-aprel oylarida 8 445 ta mast holda mashina boshqarish holati aniqlangan. Bu haqda Kun.uz’ga YHXX matbuot kotibi Zoyir Yo‘ldoshov ma’lum qildi.

Unga ko‘ra, mast holatda mashina boshqargani aniqlangan haydovchilarning 7 582 nafariga nisbatan sud ishlari ko‘rib chiqilgan. Ularning barchasi BHMning 40 baravari, ya’ni 15 mln so‘mdan jarima jazosiga tortilgan. Shuningdek, ular 3 yilgacha haydovchilik huquqidan mahrum etilgan. 863 ta holat yuzasidan sud ishlari davom etmoqda.

“Mast holda avtomashina boshqargan odamni hech ikkilanmay potensial qotil deyish mumkin. O‘zi va boshqalarning hayotini bir pulga ilmaydigan odamgina spirtli ichimlik iste’mol qilib rulga o‘tiradi. YHXX va hududiy boshqarmalar tomonidan bunday holatlarni aniqlash va jazo muqarrarligini ta’minlash maqsadida doimiy ravishda maxsus reyd tadbirlari olib borilmoqda”, deydi Zoyir Yo‘ldoshov.

Huquqbuzarliklar statistikasiga ko‘ra, transport vositasini mast holda boshqarish huquqbuzarligi yildan yilga oshib bormoqda.

2020 yilda 23 mingta holatda mast haydovchi sudga olib kelingan bo‘lsa, 2024 yilda 26 mingdan ortiq mast haydovchi ustidan sud jarayonlari bo‘lib o‘tgan. Eng ko‘p mast haydovchilar – Samarqand (4204), Xorazm (2768) va Qoraqalpog‘istonda (2669) aniqlangan. Eng kam holatlar esa Namangan (757) va Sirdaryo (562) viloyatlarida qayd etilgan.

Avvalroq Jizzaxda mast holda mashina boshqarib, opa-singilning o‘limiga sababchi bo‘lgan haydovchi uzoq muddatga qamalgani xabar qilingandi. Baxmal tumanida sodir etilgan ushbu YTHda piyodalar yo‘lagidan o‘tayotgan 4 va 13 yoshli opa-singil mast haydovchi boshqaruvidagi Cobalt urib ketishi oqibatida voqea joyida jon bergan.