“Senator so‘rov yubormaguncha pul olib yurilgan” - Tanzila Norboyeva import avtolarga ekosertifikat haqida

O‘zbekiston bojxonachilari may oyi boshida import gibrid avtomobillardan kamida Yevro-4 ekologik toifasiga mosligini tasdiqlovchi ekologik sertifikat talab qila boshlagan edi. 3 may kuni Oliy Majlis Senati bayonot berib, bu masalada ekologiya vaziriga senator so‘rovi yuborilganini ma’lum qilgandi.

Senatning bugun, 28 may kungi yalpi majlisida shu masala muhokama qilindi.

So‘rov muallifi, Senatning ekologiyaga mas’ul qo‘mitasi raisi Anvar To‘ychiyevning aytishicha, Ekologiya vazirligining javobida ayrim ma’lumotlar tushib qolgan, ayrimlari ochiqlanmagan. Shu sababli senatorlar jamoatchilik savollariga aniq javob berolmagan.

To‘ychiyev majlisda ishtirok etayotgan Ekologiya vazirligi va Bojxona qo‘mitasi mas’ullaridan ayrim jihatlarga aniqlik kiritib berishni so‘radi.

«Hozirgi kunda mamlakatimizga olib kirilayotgan M va N toifadagi elektr dvigateli bilan jihozlangan gibrid avtomobillarni bojxona organlarida rasmiylashtirish qanday? Sertifikat talab qilinyaptimi yoki qilinmayaptimi?» – deya savol berdi senator.

Ekologiya vazirining birinchi o‘rinbosari Obidjon Qudratovga ko‘ra, amaldagi nizomga muofiq, faqatgina gaz, benzin va dizel yoqilg‘isida harakatlanuvchi dvigatelga ega, M va N toifadagi avtomobillar ekologik sertifikatlanadi.

«Bugungi kunda elektrodvigatelli transport vositalarini ekologik sertifikatlash talab etilmasligi belgilab qo‘yilgan. Gibrid avtomobillar uchun istisno holatlar belgilanmagan. Bu bo‘yicha Vazirlar Mahkamasi qarori loyihasi ishlab chiqilib, vazirlik va idoralar bilan kelishildi», – dedi Qudratov.

Vazir o‘rinbosarining qo‘shimcha qilishicha, ayni paytda gibrid avtomobillardan ekologik sertifikat talab qilinmayapti.

Senat raisi Tanzila Norboyeva odamlardan to‘lov undirilgani qanchalik to‘g‘ri yoki noto‘g‘riligini so‘radi.

«Sertifikatlash bugungi kunda umuman talab etilmayapti. Bu masalada ko‘tarilgan vaqtda aniqlik kiritib, tegishli ko‘rsatmalar berdik. Bojxona qo‘mitasi bilan kelishib olindi. To‘lov undirilmasligi kerak», – deya javob berdi ekologiya vaziri o‘rinbosari Obidjon Qudratov.

Ko‘tarilgan masalaga Bojxona qo‘mitasi raisining birinchi o‘rinbosari G‘ayrat Nosirov ham izoh berib, bugungi kunda gibrid avtomobillar uchun ekologik sertifikat talab etilmayotganini u ham tasdiqladi. Shu asnoda quyidagicha qisqa dialog kuzatildi:

G‘.Nosirov: Tanzila Kamalovna, bugungi kunda gibrid avtomobillarga bojxona organlari tomonidan ekologiya sertifikati umuman talab qilinmayapti.

T.Norboyeva: Talab qilinmayapti?

G‘.Nosirov: Talab qilinmayapti.

T.Norboyeva: Lekin senator so‘rov yubormaguncha pul olib yurilgan-da.

G‘.Nosirov: U pul Ekologiya qo‘mitasiga ketadi, bizga kelmaydi, Tanzila Kamalovna. Lekin bunga aniqlik kiritib olamiz.

Bunga javoban Senat raisi “Normativ-huquqiy hujjatlar to‘g‘risida”gi qonunning 18-moddasini eslatdi. Bu moddaga ko‘ra, inson bilan davlat organlarining o‘zaro munosabatlarida yuzaga keladigan qonunchilikdagi barcha ziddiyatlar va noaniqliklar inson foydasiga talqin etilishi kerak.

“Bojxona bilan Ekologiya yaxshilab qonunning mana shu normasi ichiga kirib, odamlardan kelayotgan noroziliklarni shu nuqtayi nazardan ko‘rib chiqishinglar kerak”, dedi Norboyeva.

Avvalroq Autodeklarant kanali ekologik sertifikat uchun talab qilinayotgan to‘lov miqdori 2 mln so‘mdan oshiq ekanini yozgandi.