Gurjistonda muxolifat yetakchisi Nika Meliya qo‘lga olindi

Gurjistonlik muxolifatchi, «Axali» partiyasi va «O‘zgarish uchun» koalitsiyasi yetakchilaridan biri Nika (Nikanor) Meliya Tbilisida qo‘lga olindi. Bu haqda 29 may, payshanba kuni kechqurun uning sheriklari xabar berdi. Ularga ko‘ra, siyosatchi podkast yozib olish uchun yo‘lga chiqqanida qo‘lga olingan.

Keyinroq voqeani Gurjiston Ichki ishlar vazirligi tasdiqladi. U yerda aytilishicha, Meliya xizmat vazifasini bajarayotgan huquqni muhofaza qiluvchi organ xodimini haqorat qilgani uchun ma’muriy modda bo‘yicha qo‘lga olingan.

Ayni paytda Nika Meliya ham Gurjiston sobiq prezidenti Mixail Saakashvilining boshqaruvini tergov qiluvchi parlament komissiyasiga ko‘rsatma berishdan bosh tortgani uchun tergov ostida. Mamlakatda buning uchun jarima yoki bir yilgacha qamoq jazosi nazarda tutilgan.

Aprel oyi oxirida sud siyosatchini ehtiyot chorasi sifatida 50 000 lari (taxminan 16 100 yevro) garov evaziga ozod qildi. Meliya prinsipial ravishda bu pulni to‘lamasligini aytdi, chunki u na parlament komissiyasini, na Gurjiston parlamentining barcha tarkibini qonuniy deb hisoblamaydi. Bundan tashqari, u ehtiyot chorasini o‘zgartirish bo‘yicha sud majlisiga o‘zi kelmasligini aytdi.