Qo‘shko‘pir tumani hokimining sobiq o‘rinbosari 8 yilga qamaldi

Xorazm viloyati Qo‘shko‘pir tumani hokimining sobiq o‘rinbosari ozodlikdan mahrum qilindi. Kun.uz sud hujjati bilan tanishdi.

1991 yilda tug‘ilgan Bekzod Davlatov Qo‘shko‘pir tumani hokimining qishloq va suv xo‘jaligi masalalari bo‘yicha o‘rinbosari lavozimida ishlab kelgan. Unga nisbatan 2024 yil 13 noyabr kuni qamoqqa olish tarzidagi ehtiyot chorasi qo‘llangan.

Sud hukmiga ko‘ra, Bekzod Davlatov qishloq xo‘jaligida foydalaniladigan yer maydonlarini ajratish vakolati bo‘lmasa-da, 2024 yil 12 noyabr kuni fuqaro X.I.ga tuman hokimligi zaxirasida bo‘lgan jami 51,1 ga yer maydonini auksion savdolari orqali uning nomiga rasmiylashtirib berishni va’da qilgan. Buning evaziga hokimlik tizimidagi yuqori lavozimlarda ishlovchi mansabdor shaxslarga har bir gektar yer maydoni uchun 500 AQSh dollaridan jami 25 ming AQSh dollari va dastlabki hujjatlarni rasmiylashtirish uchun yana 50 mln so‘m berishi kerakligini aytib, aldagan.

“Zamhokim” X.I.ni mansabdor shaxsga pora berishga qiziqtirgan. Bekzod Davlatov 2024 yil 12 noyabr kuni X.I.dan 25 ming dollar hamda 50 mln so‘mni firibgarlik yo‘li bilan qo‘lga kiritishga suiqasd qilgan hamda X.I.ni pora berish jinoyati sodir qilishiga dalolatchilik qilgan.

Jinoyat ishlari bo‘yicha Tuproqqal’a tuman sudining 2025 yil 11 apreldagi hukmi bilan Bekzod Davlatovga 2 yil davlat ishtirokidagi korxona va tashkilotlarda moddiy javobgar hamda mansabdorlik lavozimlarida ishlash huquqidan mahrum qilgan holda 8 yil 1 oy ozodlikdan mahrum qilish jazosi tayinlangan. Jazoni umumiy tartibli koloniyada o‘tash belgilangan.

Xorazm viloyati sudi jinoyat ishlari bo‘yicha sudlov hay’ati apellyatsiya instansiyasining 2025 yil 16 iyundagi ajrimi bilan birinchi instansiya sudi hukmi o‘zgarishsiz qoldirilgan.