Rossiyaning Kiyev va mintaqaga hujumi oqibatida olti kishi halok bo‘ldi

23 iyun, dushanbaga o‘tar kechasi Kiyev viloyatining Belotserkovskiy tumanida Rossiyaning Ukraina poytaxti va viloyatiga uyushtirgan hujumi oqibatida kamida bir kishi halok bo‘ldi. Bu haqda Kiyev viloyati harbiy ma’muriyati (KVHM) rahbari Nikolay Kalashnik Telegramʼda yozdi.

«Afsuski, Belotserkovskiy tumanida dushman hujumi natijasida 1957 yilda tug‘ilgan ayol olgan jarohatidan halok bo‘ldi», — deyiladi uning postida. Bundan tashqari, Belotserkovskiy tumanida xususiy uylar va ko‘p qavatli uy zarar ko‘rgan, tibbiyot muassasasi joylashgan mehmonxona binosi vayron bo‘lgan.

Borispol tumanidagi ikkita xususiy uyda yong‘in sodir bo‘ldi, deya xabar beradi Kalashnik postida. Bucha tumanida to‘rtta xususiy bino va uchta avtomashinaga zarar yetgan.

Ukraina poytaxti meri Vitaliy Klichkoning ma’lum qilishicha, Kiyevga qilingan hujum oqibatida besh kishi halok bo‘lgan, 19 kishi jarohatlangan. 10 kishi, jumladan, ikki bola va homilador ayol qutqarib qolindi.

Ukraina matbuotiga ko‘ra, Rossiyaning Ukrainaga uchuvchisiz uchoqlar, ballistik va qanotli raketalar yordamida qilgan hujumi deyarli tun bo‘yi davom etgan. Shu bilan birga, Rossiya dronlari va raketalari uchun asosiy hududlardan biri Kiyev va Kiyev viloyati bo‘ldi.

Kiyev shahar harbiy ma’muriyati (KShHM) va shahar meri Vitaliy Klichko ma’lumotlariga ko‘ra, Rossiya Federatsiyasining Svyatoshin tumanidagi tungi hujumi natijasida ikki erkak: 56 va 61 yoshli shaxslar jabrlangan. Ular kasalxonaga yotqizilgan. «Svyatoshin» metro bekati infratuzilmasi shikastlangan, chiqishlardan biri vaqtincha yopilgan.

Ukraina poytaxtining Shevchenko tumanida besh qavatli binoning kirish qismi vayron bo‘ldi. Vayronalar ostida odamlar bo‘lishi mumkinligi taxmin qilinmoqda. Voqea joyida favqulodda xizmatlar ishlamoqda.

Kiyevning ayrim hududlarida yong‘inlar sodir bo‘ldi, avtomobillar va fuqarolik infratuzilmasi zarar ko‘rdi. Xususan, Solomenskiy tumanida biznes markazi va ta’lim muassasasi zarar ko‘rdi. «Ko‘p sonli oynalar singan», deyiladi KShHM postida. Darnitskiy tumanida, ushbu ma’lumotlarga ko‘ra, ikki qavatli turar joy binosi shikastlangan. Desnyanskiy tumanida turar joy binosi hovlisida portlashdan chuqurlik paydo bo‘ldi. Goloseyevskiy tumanida ikkita mashina va biznes markaziga zarar yetkazilgan.