Rossiya mudofaa vazirining sobiq o‘rinbosari 13 yilga qamaldi

Moskva shahar sudi Rossiya mudofaa vaziri Sergey Shoyguning sobiq o‘rinbosari Timur Ivanovni 13 yilga umumiy rejimdagi koloniyaga hukm qildi.

U ikkita talon-torojlikda: 2015 yilda Qrimda parom sotib olish uchun 216,6 million rublni va «Interkommers» bankiga tegishli 3,92 milliard rublni o‘marishda, shuningdek, pul yuvishda aybdor deb topildi. Ikkinchi ayblanuvchi, «Oboronlogistika» AJ sobiq rahbari Anton Filatov shu kabi jinoyatlarni sodir etgani uchun 12 yilu 6 oyga umumiy rejimdagi koloniyaga hukm qilindi.

Ayblov tomoniga ko‘ra, ikkala jinoyat ham 2015 yilda, Timur Ivanov Mudofaa vazirligiga qarashli «Oboronstroy» AJ bosh direktori lavozimida ishlagan va Anton Filatov uning shu’ba korxonasi «Oboronlogistika» MChJ direktori lavozimida ishlaganida sodir etilgan. Ular yolg‘iz emas, balki uyushgan guruhning bir qismi sifatida harakat qilgan. Ularning sherigi deb taxmin qilingan uch nafar shaxs xorijga qochib ketgan.

Birinchi epizod Gretsiyadan ikkita parom kemasini jami 12,4 million yevroga sotib olish bilan bog‘liq. Ayblov tomoni davlat ajratgan mablag‘ va kemalarga sarflangan mablag‘ o‘rtasidagi farq o‘g‘irlangan deb hisoblamoqda. Ayblov tomoniga ko‘ra, pullar ayblanuvchilar nazoratidagi kompaniyalarning bank hisob raqamlariga, xususan, maslahat xizmatlari uchun haq to‘lash niqobi ostida o‘tkazilgan.

Ikkinchi epizod «Interkommers» bankidan turli xil soxta shartnomalar bo‘yicha 3,9 milliard rubl o‘g‘irlanishi bilan bog‘liq. Bunda pul mablag‘lari 2015 yil yanvar oyida soxta valuta oldi-sotdi shartnomalari asosida bankdan chiqib ketgan va turli yuridik shaxslarga asbob-uskunalar, qurilish materiallari va hokazolarni sotib olish niqobi ostida chet elga o‘tkazilgan.

Mart oyi oxirida boshlangan sud jarayonida sudlanuvchilar barcha ayblovlarni rad etdi. Ishda davlat sirini tashkil etuvchi ma’lumotlar mavjudligi sababli sud yopiq tarzda o‘tkazildi.

Tomonlar bahsida prokuratura Ivanovni 14 yilu 6 oyga, Filatovni esa mol-mulkini musodara qilgan holda 14 yilga ozodlikdan mahrum qilishni talab qildi. Advokatlar ayblanuvchilarni oqlashni so‘radi.

Natijada Moskva shahar sudi Timur Ivanovni 13 yilga umumiy rejimdagi koloniyaga hukm qildi va 100 million rubl miqdorida jarimaga tortdi. Sud qarori bilan u davlat mukofotlaridan mahrum qilindi. Sud sobiq vazir o‘rinbosarining qo‘l ostidagi xodimi Anton Filatovni 12 yilu 6 oyga ozodlikdan mahrum qildi. Filatov 25 million rubl jarimaga tortildi. Sud, shuningdek, Ivanov va Filatovdan jabrlangan tomonlarning da’volari bo‘yicha 4 milliard rubldan ortiq mablag‘ undirdi. Advokatlar hukm ustidan shikoyat qilishi mumkin.