Rossiya Kiyevga dronlar va ballistik raketalar bilan hujum qildi

10 iyul, payshanbaga o‘tar kechasi Ukraina poytaxti Rossiyaning yirik hujumiga uchradi. Kiyev aholisi kuchli portlashlar haqida xabar bergan. Kiyev rasmiylariga ko‘ra, Rossiya Federatsiyasi dronlar va ballistikadan foydalangan.

Kiyev shahar harbiy ma’muriyati rahbari Timur Tkachenkoga ko‘ra, hujum oqibatlari Ukraina poytaxtining olti tumanida qayd etilgan. «Turar joy binolari, avtomobillar, omborlar, ofis va noturar binolar yonmoqda», — deb yozdi rasmiy Telegramʼda. Kiyev meri Vitaliy Klichko Shevchenko, Darnitskiy, Solomenskiy, Goloseyevskiy va Podolskiy tumanlarida uchuvchisiz uchoqlarning qulashi natijasida yong‘inlar haqida ma’lum qildi.

Tkachenkoning so‘zlariga ko‘ra, ikki kishi halok bo‘lgan, 13 kishi yaralangan. Bundan tashqari, ma’muriyat rahbari Kiyevda havo ifloslanishi kuchayganini ma’lum qildi. Siyosatchi boshpanalardan uyga qaytayotgan aholini derazalarini ochmaslikka chaqirdi.

Klichkoning so‘zlariga ko‘ra, jabrlanganlar soni 14 nafarga yetgan. To‘qqiz nafari kasalxonaga yotqizilgan, qolganlariga esa joyida yoki ambulator yordam ko‘rsatilgan. Podolskiy tumanida 1-sonli birlamchi tibbiy yordam markazining ambulatoriyasi deyarli butunlay vayron bo‘lgan.

Klichkoning qo‘shimcha qilishicha, Shevchenko tumanida turar joy binosining yuqori qavatida yong‘in chiqqan. Vayronalarning qulashi yana bir qancha manzillarda qayd etilgan. Darnitskiy tumanida garajlar va yonilg‘i quyish shoxobchasida yong‘in sodir bo‘ldi. Bundan tashqari, turar joy binolaridan birining hovlisiga bo‘laklar tushgan. Solomenskiy tumanida turar joy bo‘lmagan binoning tomi, Goloseyevskiy tumanida yuk mashinasi yonib ketdi. Podolskiy tumanida turar joy bo‘lmagan bino hududiga bo‘laklar tushdi.