YeIning yangi sanksiyalari Rossiya nefti narxini 15 foizga tushirishi mumkin

Hamjamiyat mamlakatlari tomonidan ma’qullanishi kerak bo‘lgan Rossiyaga qarshi Yevropa Ittifoqining 18-sanksiyalari to‘plami yangi choralari Rossiya nefti narxini o‘rtacha jahon darajasidan 15 foizga pasaytirishni nazarda tutadi. Bu haqda Reuters va Politico nashrlari xabar berdi. 11 iyul kuni Amerikaning Bloomberg agentligi xuddi shu haqda yozgan edi.

Ularning manbalariga ko‘ra, Yevropa Ittifoqi neftning o‘rtacha narxini bir necha oylar natijalariga ko‘ra hisoblashni va Rossiya xomashyosi tannarxiga ushbu ko‘rsatkichdan 15 foizga past chegara belgilashni taklif qilmoqda. Hozirda chegara belgilangan va bir barrel uchun 60 dollarni tashkil etadi.

Reuters xabariga ko‘ra, o‘rtacha narx har olti oyda yangilanadi. Bloomberg ma’lumotlariga ko‘ra — har o‘n haftada yoki uch oyda bir marta. Politico'ga ko‘ra — har uch oyda bir marta.

Reuters agentligining yozishicha, yangi chora-tadbirlar joriy etilgandan so‘ng Rossiya Federatsiyasidan neft uchun limit darhol bir barrel uchun 47 dollarni tashkil qiladi. Bloomberg bu ko‘rsatkichni 50 dollarga baholamoqda. Ayni paytda Brent Yevropa markasi bozorda bir barrel uchun taxminan 70 dollardan sotilmoqda.

11 iyul kuni YeI diplomatlari DW nashriga YeI davlatlari Rossiyaga qarshi sanksiyalarning 18-paketi bo‘yicha hali kelisha olmaganini aytdi: Slovakiya uni bloklab qo‘ygan, shuningdek, neft narxining yuqori chegarasi bo‘yicha ham muhokamalar davom etgan. DW manbalari bozordagi vaziyatga qarab muntazam ravishda qayta ko‘rib chiqiladigan o‘zgaruvchan narx shifti muhokama qilinayotganini tasdiqladi.