Ukrain dronlari hujumi sabab Moskva osmoni to‘liq yopildi

20 iyulga o‘tar kechasi Moskvaga ukrain dronlarining navbatdagi hujumi kuzatildi. Shahar meri Sergey Sobyaninga ko‘ra, 19 iyul kuni soat 18:00 dan boshlab Rossiya havo hujumidan mudofaa kuchlari 20 dan ortiq dronni urib tushirishga muvaffaq bo‘lgan. RF mudofaa vazirligi Moskva regioni ustida urib tushirilgan 19 ta uchuvchisiz uchish qurilmasi haqida xabar bergan, shundan 16 tasi to‘g‘ri Moskva tomon uchgan.

Dronlardan biri Zelenograddagi turar joy binosiga urilgan – Sobyanin «dastlabki ma’lumotlarga ko‘ra, jiddiy shikastlanish hamda jabrlanganlar yo‘qligi»ni ma’lum qilgan. Uy yaqinida turgan ikkita avtomobil yonib ketgan.

Ukraina qurolli kuchlarining bu miqdordagi dronlarining poytaxtga hujumi so‘nggi bor 6 mayda, Rossiyada G‘alaba kuni nishonlanishi arafasida kuzatilgandi.

20 iyulga o‘tar kechasi amalga oshirilgan hujum fonida Moskvadagi Sheremetevo, Vnukovo, Domodedovo va Jukovskiy aeroportlari bir necha soat mobaynida samolyotlarni uchirish va qabul qilishga cheklovlar o‘rnatishga majbur bo‘ldi. Cheklovlar Nijniy Novgorod, Kaluga va Yaroslavldagi aeroportlarga ham taalluqli bo‘lgan. Bu haqda Rosaviatsiya rasmiy vakili Artem Korenyako telegram-kanalda shunday yozadi:

Havo kemalarini qabul qilish va chiqarish bo‘yicha vaqtinchalik cheklovlar joriy etildi. Cheklovlar parvozlar xavfsizligini ta’minlash uchun zarur. Havo kemalari ekipajlari, aviadispetcherlar va aeroport xizmatlari parvozlar xavfsizligini ta’minlash uchun barcha zarur choralarni ko‘rmoqda – bu ustuvor vazifa.

«Aeroflot» Sheremetevodagi cheklovlar tufayli «jadvalga tuzatish kiritishga majbur bo‘ldi» – parvoz vaqti o‘zgartirildi va ba’zi reyslar, masalan, Minskka ikkita reys bekor qilindi. «Pobeda» vakillari ham «majburiy tuzatishlar» haqida xabar berishgan.

Cheklovlar Rossiyaning boshqa aeroportlariga ham ta’sir qildi. Xususan, Krasnoyarskdan Moskvaga «Aeroflot», «Pobeda» va NordStar samolyotlari ucha olmagan. Peterburgning Pulkovo aeroporti, Rosaviatsiya ma’lumotlariga ko‘ra, Moskvaga parvoz qilgan 30 ga yaqin reysni qabul qilgan. Korenyakoning yozishicha, jami 134 ta samolyot zaxira aerodromlarga yo‘naltirilgan.

Reyslar kechikishi va qoldirilishidan minglab yo‘lovchilar jabr ko‘rdi. Astra telegram-kanali Sheremetevoda odamlar to‘plangani aks etgan videoni joylashtirdi. Telegramdagi «Ostorojno, Moskva» va «Ostorojno, novosti» kanallarida Sheremetevo va Vnukovodagi sun’iy gazonlar ustida uxlayotgan yo‘lovchilar videosi paydo bo‘ldi. Shuningdek, jurnalistlar Turkiyaning Antaliya shahridan Moskvaga uchib, Pulkovoga qo‘ngan odamlar bilan suhbatlashishga muvaffaq bo‘lgan. Ularning so‘zlariga ko‘ra, ekipaj a’zolari samolyot yonilg‘i quyilgandan so‘ng darhol Moskvaga uchishini aytgan, biroq keyin odamlarni tushirilgan va yuklarni olinishi kerakligi aytilgan.

«[Aviakompaniya] vakillari va ekipaj a’zolari oldimizga chiqishdan bosh tortmoqda. Samolyotda taxminan 400 kishi, ko‘plab yosh bolalar bor. Yo‘lovchilar aeroportda qolib ketishdi, [ularni] na suv, na mehmonxona, na oziq-ovqat bilan ta’minlashdi», – deydi «Ostorojno, Moskva» kanali bilan suhbatlashganlar.

Telegram-kanallardagi boshqa videolar ham aviakompaniyalar va aeroportlar vakillari yo‘lovchilarga hech qanday ma’lumot bera olmaganini ko‘rsatmoqda.

20 iyul kuni, kunning ikkinchi yarmidagi holatga ko‘ra, Kaluga shahrining Gribovo va Moskvaning Vnukovo shaharlarida cheklovlar hali ham amal qilmoqda. Sheremetevo bir necha soat davomida odatiy rejimda ishlagan, biroq Moskva vaqti bilan soat 12:30 da bu aeroportda yana cheklovlar kiritilgan. Bir soatdan keyin Vnukovoda ham, Sheremetevoda ham cheklovlar olib tashlandi.

Rossiya ham 20 iyulga o‘tar kechasi Ukraina hududiga dronlar bilan hujum qildi. Ukraina qurolli kuchlari havo kuchlari ma’lumotlariga ko‘ra, Ukraina havo mudofaasi 57 ta drondan 18 tasini urib tushirgan, yana yettitasi «manzilga yetib bormasdan yo‘qolgan yoki radioelektron kurash vositalari bilan bostirilgan».

Ukraina dronlarining Rossiya hududiga hujumlari 4 iyul kuni Volodimir Zelenskiyning Donald Tramp bilan telefon orqali muloqotidan keyin tez-tez sodir bo‘lmoqda. Umuman olganda, «Agenstvo» hisob-kitoblariga ko‘ra, o‘sha kundan jumagacha Moskva va Moskva atrofi to‘qqiz kun, ya’ni 20 iyul zarbasini hisobga olgan holda 11 kun davomida hujumga uchragan. 19 iyulga o‘tar kechasi Rossiya mudofaa vazirligi ma’lumotlariga ko‘ra, havo hujumidan mudofaa kuchlari Moskva oblasti ustida 16 ta dronni urib tushirgan, ulardan 13 tasi Moskvaga uchayotgandi.