Россиянинг Удмуртия республикаси раҳбари қўлга олинди

Россиянинг Удмуртия республикаси раҳбари Александр Соловьев қўлга олинди. У 140 миллион рубль миқдорида пора олганликда гумонланмоқда. Бу ҳақда РФ Тергов қўмитаси расмий вакили Светлана Петренко маълум қилди.

Унинг сўзларига кўра, амалдорга нисбатан ўта йирик ҳажмда пора олиш моддаси бўйича жиноят иши қўзғатилган. 

Терговга кўра, Соловьев 2014-2016 йилларда Кама ва Буй дарёлари устида кўприк қуриш билан шуғулланган компаниядан 139 миллион рубль олган. Бундан ташқари, унга тижорат ташкилотининг 2,7 миллион рубллик улуши ҳам теккан.

Терговчиларнинг фикрича, минтақа раҳбари бунинг учун ишларга навбатдан ташқари тўловни федерал ва минтақавий бюджет ҳисобидан амалга ошириши лозим бўлган.