«Унинг қаршисида заиф кўринмаслик керак»

АҚШга ташрифи олдидан Франция президенти Эмманюэль Макрон Американинг Fox News телеканалига интервью берди. У Россия ва ушбу мамлакат президенти олиб бораётган сиёсатга муносабатини билдириб ўтган. AFP ва Franceinfo нашрлари интервьюдан парчалар эълон қилган.

Журналист Крис Уоллиснинг саволларига жавоб берар экан Эмманюэль Макрон Владимир Путинни «кучли шахс» дея таърифлаган ва «ҳеч қачон унинг қаршисида заиф кўринмаслик» кераклигини таъкидлаган: «Агар кучсиз кўринсангиз, у бундан албатта фойдаланади... У кучли, ақлли ва анойи эмас.

Владимир Путин «ҳаммаёққа аралашади, Европада, Қўшма Штатларда демократияга зарар келтиришга ҳаракат қилади, у буни ўз мамлакати учун яхши деб ҳисоблайди», деган у.

У яна шундай қўшимча қилган: «У Буюк Россияни истайди. Россияликлар унинг сиёсати билан мағрурланишади. У камчиликка ва ўз рақибларига фавқулодда равишда тоқатсиз, унинг ғоялари демократияга бегона». Шу билан бирга жаноб Макрон «у билан доимий алоқаларда» бўлиб туришини қўшимча қилган: «Мен уни ҳурмат қиламан. Мен уни биламан. Мен уни ҳушёрлик билан баҳолайман».