ЙТҲ содир этиб, воқеа жойидан қочиб кетган ҳайдовчи қидирилмоқда

2019 йил 4 август куни соат 00:20ларда Навоий вилоятининг Навбаҳор тумани “М.Улуғбек” МФЙда яшаган 38 ёшли Қ.Р. Навбаҳор тумани ҳудудидан ўтувчи “Навбаҳор-Нурота” йўлининг четидан тан жароҳатлари билан топилган.

Ўзбекистон Республикаси ИИВ Жамоатчилик ва ОАВ билан алоқалар бошқармаси хабарига кўра, у тез тиббий ёрдам ходимлари томонидан туман марказий шифохонасига олиб борилган ва кўрсатилган тиббий муолажаларга қарамай шу куни вафот этган. Аниқланишича, Қ.Р. йўл-транспорт ҳодисаси натижасида жароҳат олган.

Ҳозирда ушбу йўл-транспорт ҳодисасини содир этган номаълум шахсни аниқлаш ва ушлаш чоралари кўрилган. Ҳолат юзасидан жиноят иши қўзғатилиб, тергов ҳаракатлари олиб борилмоқда. 

“Ҳурматли фуқаролар, ушбу йўл-транспорт ҳодисасини содир этган ҳайдовчи ва унинг бошқарувидаги автомашина ҳақида бирон-бир маълумотга эга бўлсангиз, ички ишлар органларининг ҳудудий бўлимларига ёки “102” телефон рақамига хабар беришингизни сўраймиз”, - дейилади ИИВ хабарида.