Париж 12 нафар жазоирлик дипломатни мамлакатдан чиқариб юборяпти

Франция 12 нафар жазоирлик дипломат ва консуллик ходимларини мамлакатдан чиқариб юбориш ва Жазоирдаги элчисини чақириб олиш қарорини эълон қилди. Бу ҳақда Елисей саройининг 15 апрел, сешанба куни чоп этилган баёнотида айтилади. Жазоир вакилларига Францияни тарк этишлари учун 48 соат вақт берилди.

Парижнинг бу ҳаракати Жазоирнинг Франция элчихонасининг 12 нафар ходимини мамлакатдан чиқариб юбориш ҳақидаги худди шундай қарорига жавоб бўлди. Франция президенти Эммануэл Макроннинг идораси Жазоирнинг ҳаракатларини «тушунарсиз ва оқлаб бўлмайдиган» деб атади ва мулоқотни қайта бошлашга чақирди. «Икки томонлама муносабатларимиз кескин ёмонлашгани учун жавобгарлик Жазоир ҳукумати зиммасига тушади», — дейилади ҳужжатда.

Жазоир президенти Абделмаджид Теббун ва Эммануэл Макроннинг мамлакатлар ўртасидаги алоқаларни тиклашга қаратилган телефон суҳбатидан атиги икки ҳафта ўтиб икки давлат ўртасидаги муносабатлар бундай тус олганидан Франция «ҳайратда». Франция ташқи ишлар вазири Жан-Ноэл Барронинг айтишича, Жазоир «эскалация йўлини танлаган».

Ўтган йили Франция Марокашнинг Ғарбий Саҳро, яъни "Полисарио фронти" партизан ҳаракати Жазоир кўмагида мустақиллик учун курашаётган баҳсли ҳудуддаги суверенитетини тан олганидан сўнг мамлакатлар ўртасидаги муносабатлар ёмонлашди, деб ёзади AFP. Бироқ кескинлашувнинг сўнгги босқичи жорий йилнинг апрел ойида содир бўлди, ўшанда уч нафар Жазоир фуқароси, жумладан, Жазоир элчихонаси ходими Францияда ҳибсга олинди.