“Gentra – қоронғилик тимсоли” – Миршакар Файзуллоев

Кun podkastiʼнинг бу галги меҳмони стендап-комик, юморист Миршакар Файзуллоев билан ижодкорнинг сўнгги катта концерти, концерт учун тайёрланган антиқа таклифноманинг рамзий маъноси, концерт жараёнида Gentraʼнинг пачақланишида қандай маъно борлиги, бу ғоянинг оилавий қадриятларга тааллуқли жиҳатлари, ижодкорнинг “МТВ шоу” лойиҳасидан нима сабабдан кетгани, бугун телеканалларда шоу лойиҳалар тайёрламаслик сабаблари ва бошқа мавзуларда суҳбатлашилди.

Шу йилнинг 15 феврал куни Тошкентдаги Humo Arena мажмуасида ўзбек стендап-комиги Миршакар Файзуллоевнинг илк катта концерти бўлиб ўтди. Ушбу тадбир нафақат ҳазил-мутойибалар, балки ажабланарли перформанс билан ҳам ёдда қолди. Концертга таклифнома шаклида бонканинг танланишида ҳам ўзига хос ғоя бор эди. Ижодкорнинг фикрига кўра, унинг таг замирида оилавий қадриятларга содиқлик масаласи ҳам туриши ўйланган.

– Бугун қайси мавзуда томошабинлар билан мулоқот қилиш қийин?

– Томошабин ҳар хил. Катта саҳнага чиққанда биз негадир мингта одамни томошабин дейишга ўрганиб қолганмиз. Мингта одамнинг ҳар бири алоҳида шахс. Стендап клубда эса томошабин бизга яқин ўтиради. Уларнинг эмоцияларини аниқ кўриб турасиз. Шу сабаб стендап клубда ишлаш нисбатан мураккаб.

– Сиз қайси мавзуларда умуман гапирмайсиз?

– Кимнингдир ҳаёт мазмунига айланган мавзуларда гапирмайман. Бу мавзуларнинг сизга келтирадиган фойдасидан кўра етказадиган зарари кўпроқ. Қолаверса, бирор кимнинг жисмоний камчиликларига тўхталмайман. Бундан ташқари, томошабиннинг шахсияти ҳақида умуман тўхталмасликка ҳаракат қиламан.

– Сизни ҳеч эсдан чиқмайдиган даражада танқид қилганлар бўлганми?

– Айнан шунақаси бўлмаган, лекин ўринли маслаҳат айтишган. НТТ телеканали бўларди. Шу канал ходими менга Бухоро шевасида гапирмасликни маслаҳат берган. Яъни шева менинг ажралиб турадиган жиҳатим, лекин доим ундан фойдаланаверсам, бошқа алоҳидалик менда бўлмаслигини айтган. Ўринли маслаҳат бўлган ва қабул қилганман. Яна бир маслаҳат, менга кўзойнак тақишни тавсия қилишган. Кўзойнак юзимдаги жиддийликни яширишини тўғри тушунтиришган. Буларни қабул қилганман. Кулишим борасида ҳам кўп айтишган. Лекин бундан воз кечолмайман, узр, буни мен танламаганман.

– Ҳазил қилаётган ижодкорнинг ўз ҳазилига ўзи кулиши тўғри деб ўйлайсизми?

– Бунда чегара йўқ, вазиятга боғлиқ. Агар бу самимий чиқиш бўладиган бўлса, вазиятдан келиб чиқса, бу ўринли. Сиз ҳам одамсиз, сизда ҳам ҳиссиёт бор, бу табиий. Агар стендап концерт бўлса, бунда кулиш ҳам сценарий асосида бўлади.

– “Миллий” телеканалида сиз бошловчилик қилган “МТВ шоу” лойиҳасини энг кўримли бўлиб турган вақтда тўхтатдингиз. Нега?

– Худди шундай ҳиссиёт билан эсда қолиши учун. Бошида шоуда 50 та одам ишларди. Кейин иккита-иккитадан ижодкорлар олиниб, бошқа лойиҳаларга жалб қилинган эди. Аста-секин лойиҳадаги ижодкорлар камайишни бошлади. Бу эса тўғридан тўгри сифатга таъсир қилади. Орқада катта жамоа ишлаган ҳар кунлик лойиҳани тўртта одам билан қилиш жуда қийин эди. Ва сиз кўриб турибсиз, ҳозир шу ҳолатда давом этсангиз, бу кўрсатув кундан кунга ёмонлашиб боради. Лекин ҳозир тўхтатсангиз, ҳеч нарса ўзгармайди. Кейин лойиҳа камчиликларини айтиб тўхтатишганидан кўра, бугун ўзимиз тўхтатишни маъқул топдик.

Интервюнинг тўлиқ шаклини юқоридаги видео орқали томоша қилишингиз мумкин.