Мерц Путинни 12 майдан бошлаб ўт очишни тўхтатишга чақирди

Германия канцлери Фридрих Мерц 11 май, якшанба куни Россия президенти Владимир Путинни 12 майдан бошлаб ўт очишни тўхтатишга рози бўлишга чақирди. «Агар Россия томони ҳозирда музокараларга тайёрлигини билдираётган бўлса, бу яхши белги. Бироқ, бу етарли эмаслиги аниқ», — деди Мерц.

Германия канцлерининг сўзларига кўра, Москванинг ўт очишни тўхтатишга розилиги «ҳақиқий музокаралар ўтказишнинг ягона йўли»дир. «Аввал қуроллар жим бўлиши керак, кейин музокаралар бошланиши мумкин», деди Мерц. У, шунингдек, Киев 30 кунлик ўт очишни тўхтатишга тайёрлигини билдирганини таъкидлади.

Аввалроқ Франция президенти Эммануэл Макрон ҳам худди шундай баёнот билан чиққан эди. У украиналиклар бомбардимон қилинишда давом этар экан, музокара олиб борилишини қабул қилиб бўлмас деб атади.

Бундан олдин Россия президенти Владимир Путин Украинага «можаронинг асл сабабларини бартараф этиш ва тарихий истиқболга эга узоқ муддатли, мустаҳкам тинчлик ўрнатиш учун» 15 май куни Истанбулда урушни тугатиш бўйича олдиндан ҳеч қандай шартларсиз тўғридан тўғри музокаралар ўтказишни таклиф қилди. Шу тариқа у Украина ва Европанинг тўртта давлатининг 12 майдан бошлаб 30 кунлик оташкесим ҳақидаги таклифига тўғридан тўғри изоҳ бермаган бўлса-да, жавоб қайтарди.