Ўзбекистон бош вазири ўринбосари EТТБ президенти билан учрашди

Ўзбекистон бош вазирининг ўринбосари Жамшид Хўжаев бошчилигидаги мамлакат делегацияси Европа тикланиш ва тараққиёт банкининг Лондонда бўлиб ўтган 34-йиллик йиғилишида иштирок этди.

Фото: "Дунё" АА

Бу йилги анжуман "Истиқболларни кенгайтириш, мустаҳкам кучларни сақлаш" мавзусида ташкил этилди. Панел сессияларда иқлим, энергетик хавфсизлик, геосиёсат ва геоиқтисодиёт, нодавлат ташкилотларнинг бизнес муҳитни яхшилашдаги роли, сув ресурсларидан оқилона фойдаланиш каби масалалар муҳокама қилинди.

Бошқарув кенгашининг пленар сессиясида Ўзбекистон делегацияси раҳбари маъруза қилди. Унда Ўзбекистон ва ЕТТБ ўртасидаги ҳамкорликнинг ҳолати ва истиқболларига тўхталиб ўтилди.

Ўзбекистон делегацияси ташриф доирасида EТТБ президенти Одил Рено-Бассо билан учрашди.

Ўзбекистон минтақада EТТБ маблағларини энг кўп олаётган давлат ҳисобланади. Банк ҳозирга қадар мамлакатга 174 та лойиҳага жами 5,5 миллиард АҚШ доллари миқдорида сармоя киритган. Жорий портфел 3 миллиард доллар қийматдаги 95 та лойиҳадан иборат.

Шунингдек, Буюк Британия энергетика хавфсизлиги ва углерод нейтраллик вазирлиги, Экспортни молиялаштириш агентлиги, Standart Chartered банки, International Hospitals Group, United Green Group ва Rolls-Royce каби йирик компаниялар раҳбарияти билан музокаралар ўтказилди.

#Жамшид Хўжаев #EТТБ