РФда судланган америкалик Татер Россияни тарк этди

АҚШ фуқароси Жозеф Татер Москвадаги Н.А.Алексеев номидаги психиатрия клиник шифохонасидан чиқарилди ва Россияни тарк этди, деб хабар бермоқда ТАСС 6 июн, жума куни ҳуқуқ-тартибот идораларидаги манбаларига таяниб. Шифокорларда «уни (Татер) клиникада ушлаб туриш учун ҳеч қандай сабаб йўқ эди, шунинг учун у амбулатор даволаниш учун чиқарилди», дея маълум қилди тиббиёт вакиллари агентликка. «Татер қандайдир тарзда Москванинг Мешчанский суди қарори билан мажбурий даволаниш учун юборилган тиббиёт муассасасини тарк этишга муваффақ бўлди. Ҳозирда америкалик қаерда эканлиги аниқ эмас, у Россия Федерациясини тарк этган», — деди агентлик манбаси.

Америкаликнинг адвокати Полина Власюк «бу ҳақда ҳеч нарса билмаслигини» айтди. Май ойида Reuters агентлиги Россияда судланган АҚШ фуқаролари рўйхатини эълон қилди, улар Вашингтон Москва билан алмашинув доирасида қайтарилиши мумкин. Рўйхатга 46 ёшли Жозеф Татер ҳам киритилган.

Татер 2024 йил августида Москвада қўлга олинган. Тергов маълумотларига кўра, у Radisson Blu Olympiyskiy меҳмонхонасига кириш вақтида жанжал уюштирган, бўлимга етиб келганида полициячини уриб юборган. Америкалик ҳукумат вакилига нисбатан зўравонлик қўллашда айбланган (Россия Федерацияси Жиноят кодексининг 318-моддаси 1-қисми).