Евроиттифоқ Қрим ва Севастопол учун санкцияларни узайтирди

Европа Иттифоқи Россиянинг Қрим яримороли ва Севастопол шаҳрини ноқонуний қўшиб олиши муносабати билан 2014 йил июн ойида жорий қилган санкцияларни яна бир йилга узайтирди. Бу ҳақда 16 июн, душанба куни ЕИ кенгаши маълум қилди.

Брюсселнинг эслатишича, гап қўшиб олинган Қримдан Европа Иттифоқига товар ва хизматлар импортини тақиқлаш, яриморол иқтисодиётига сармоя киритиш, шунингдек, транспорт, телекоммуникация, энергетика, нефт ва газ саноати учун товарлар ва технологияларни етказиб бериш ҳақида кетмоқда.

Европа Иттифоқи кенгаши ўзининг пресс-релизида таъкидлаганидек, 2022 йилдан бери Россия Федерацияси Украина суверенитети ва ҳудудий яхлитлигини бузишда янада кўпроққа бориб, бу мамлакатга қарши кенг кўламли урушни бошлаб юборди. «Европа Иттифоқи Украинанинг халқаро миқёсда тан олинган чегаралари доирасидаги мустақиллиги, суверенитети ва ҳудудий яхлитлиги ҳамда Россия агрессиясидан ўзи ҳимоя қилишнинг ажралмас ҳуқуқига содиқ қолади», — дейилади матнда.

Россия Федерациясининг Украинага қарши ҳарбий тажовузи муносабати билан Брюссел аллақачон Москвага қарши 17 та санкция пакетини жорий қилган. Улардан охиргиси Россия ўз нефтини экспорт қилиш учун фойдаланадиган «соядаги флот»нинг яна 200 та кемасига чекловларни ўз ичига олади. Бундан ташқари, 75 та янги юридик ва жисмоний шахслар Европа Иттифоқининг санкциялар рўйхатига киритилди.

Bloomberg маълумотларига кўра, Европа Иттифоқининг навбатдаги, 18-санкциялар пакети Россия молия секторига қаратилган. Хусусан, яна 20 та Россия банкининг халқаро SWIFT тўлов тизимидан узилиши муҳокама қилинмоқда. Яна бир эҳтимолий қадам - Россия нефтининг нархи чегарасини бир баррел учун 60 доллардан 30 долларгача тушириш.