Россия думаси чет элга турлар учун солиқ жорий қилмоқчи

Россия Федерацияси Давлат думаси чет элда россияликлар учун турлар ташкил қилувчи операторларга солиқ жорий қилмоқчи. Таклифни тегишли қўмита раиси, «Новые люди» фракцияси аъзоси Сангажи Тарбаев берди. Унинг сўзларини Absatz интернет нашри келтирган.

«Ушбу чора жорий этилиши мумкин, аммо бу иқтисодиётга қандай таъсир қилишини кўришимиз керак», деди у. «Бундан ташқари, катта эҳтимол билан жисмоний шахслар учун эмас, балки юридик шахслар, яъни фаолият билан шуғулланувчи туроператорлар учун тўлов жорий этилиши керак», — дея қўшимча қилди парламентарий.

Сангажи Тарбаевнинг сўзларига кўра, 2024 йилда Россия фуқаролари томонидан электрон йўлланмалар учун ўтказилган умумий сумма тахминан 700 миллиард рублни ташкил этган. Агар ҳар бир йўлланма учун солиқ қўшилса, бу унинг нархини 200-300 рублга оширади, у ҳолда Россияда соҳа эҳтиёжлари учун ҳар йили тахминан 5-7 миллиард рубл ажратиш мумкин – улар мамлакат инфратузилмасини ривожлантиришга йўналтирилади, деди депутат.

Унинг таъкидлашича, маблағлар, хусусан, Байкал кўли, Олтой ва Карелия экологиясини сақлашга ажратилиши мумкин. Шу билан бирга, йиғим жорий этиш бўйича якуний қарор барча иқтисодий хавфларни баҳолагандан кейингина қабул қилинади, деди Тарбаев.