ЕИ комиссияси Украинага 100 млрд евро ажратишни таклиф қилмоқда

Еврокомиссия Украинага Европа Иттифоқининг 2028-2034 йилларга мўлжалланган узоқ муддатли бюджетидан 100 миллиард евро ажратишни таклиф қилди. Бу ҳақда унинг раиси Урсула фон дер Ляйен 16 июл, чоршанба куни Брюсселда бўлиб ўтган брифингда бюджет лойиҳасини тақдим этар экан, маълум қилди.

Европа Иттифоқининг 2027 йилгача қайта кўриб чиқилган бюджетига киритилган Украинага жорий ёрдам фонди 50 миллиард еврони ташкил этади. Еврокомиссия раҳбарининг сўзларига кўра, бу маблағлар аста-секин, лекин тугаяпти, шунинг учун янги таклиф Украинага «унинг тикланиши, барқарорлигини ва албатта, Европа Иттифоқига аъзо бўлиш йўлини қўллаб-қувватлаш учун» ёрдам фондини тўлдириш мақсадида бу миқдорни икки баравар оширишга мўлжалланган. 

Еврокомиссия томонидан таклиф қилинган 2028-2034 йилларга мўлжалланган Европа Иттифоқи бюджетининг умумий миқдори 1,816 триллион еврони ташкил қилади. Жорий бюджет билан солиштирганда, бу ЕИ ялпи миллий даромадининг 1,1 фоиздан 1,26 фоизигача ошганини билдиради. Таклиф кейинги икки йил давомида Европа Иттифоқи ҳукуматлари ва Европарламент томонидан муҳокама қилинади.