АҚШ ва Украина Трамп-Путин саммити олдидан учрашувга тайёрланмоқда

АҚШ, Украина ва бир қатор Европа давлатлари вакиллари 15 август куни Аляскада Доналд Трамп ва Владимир Путиннинг саммити олдидан умумий позицияни ишлаб чиқиш учун шу дам олиш кунлари Буюк Британияда учрашмоқчи. Бу ҳақда 8 август, жума куни режалардан хабардор уч манбага таяниб, Axios хабар берди. Киев ва унинг НАТОдаги қатор иттифоқчилари Трамп Путиннинг урушни тартибга солиш бўйича таклифларига уларнинг позициясини эътиборсиз қолдириб, рози бўлиши мумкинлигидан хавотирда, деб ёзади Axios.

Унга кўра, шахсий учрашув ғояси 8 август куни АҚШ, Украина ва Европа расмийлари ўртасида бўлиб ўтган телекўприк чоғида муҳокама қилинган – сўнгги уч кундаги учинчи шундай видеомулоқотда. Учрашув логистикаси ва унинг иштирокчилари ҳақидаги саволлар ҳали ҳам муҳокама қилинмоқда.

6 август, чоршанба куни Трамп Украина президенти Владимир Зеленский ва бир қатор Европа етакчилари билан телеконференция ўтказди ва у Уиткоффнинг Путин билан учрашуви якунлари ҳақида маълумот берди. Икки манбага кўра, Уиткофф, агар Украина Луханск ва Донецк вилоятлари, шунингдек, Қрим Москвага берилса, Путин урушни тугатишга рози бўлганини даъво қилмоқда.

Телекўприкнинг айрим иштирокчилари Путин Херсон ва Запорижжя вилоятларига даъволаридан воз кечишга тайёр деган таассуротда қолди, деб ёзади нашр. Бу Россиянинг олдинги позициясидан сезиларли имтиёз бўларди. 8 август, жума куни томонлар қўшма позицияни келишиб олишга ҳаракат қилиш учун шахсан учрашиш имкониятини муҳокама қилди. Украина расмийларининг айтишича, улар Россия таклифи тафсилотларини ёки АҚШнинг бу борадаги позициясини тушунмаяпти.