«Vajnyye istorii»: Serbiya Kremlga yaqin shaxslarga fuqarolik beryapti

Rossiyaning Ukrainaga qarshi urushi paytida 200 dan ortiq rossiyalik «mamlakat oldidagi xizmatlari» uchun Serbiya pasportini olgan. Ular orasida davlat kompaniyalari rahbarlari, mudofaa korxonalari xodimlari va Danone'ning Rossiyadagi aktivlari yangi egasi bor.

Foto: Stanislav Krasilnikov / TASS

«Vajnyye istorii» surishtiruv nashri Rossiyaning Ukrainaga qarshi urushi boshlanganidan beri Kreml va Rossiya mudofaa sanoati bilan bog‘liq bo‘lgan o‘nlab rossiyaliklar Serbiya fuqaroligini olganini aniqladi. Nashrning 16 aprel, chorshanba kuni xabar berishicha, Kreml odamlari Serbiyada «respublika oldidagi xizmatlari» uchun fuqarolikni olishga ruxsat beruvchi qonundan foydalanmoqda.

Serbiya fuqaroligi odatda mamlakat uchun biznes, ilm-fan, sport yoki san’atda alohida ajralib turuvchi shaxslarga maxsus tarzda beriladi. Shu bilan birga, oluvchilar boshqa fuqaroligidan yoki hatto Serbiyada yashashdan voz kechishlari shart emas, deb yozadi «Vajnyye istorii». Sanksiyalar ostida bo‘lmagan Serbiya pasportlari egalari Yevropa Ittifoqi mamlakatlariga erkin sayohat qilishlari mumkin.

«Vajnyx istoriy» surishtiruvchilari Serbiya rasmiylarining rasmiy yuridik nashrini o‘rganib chiqdi va Kremlga yaqin bo‘lgan bir qator odamlar ham Serbiya qonunining ushbu qulay moddasidan foydalanganliklarini aniqladilar. Nashrning ma’lum qilishicha, Ukrainadagi urush paytida jami 204 nafar rossiyalik «respublika manfaatlari uchun» so‘zlari bilan Serbiya fuqaroligini olgan.

Ular orasida Grozniyning sobiq vitse-meri va Rossiyani tark etgan Fransiyaning Danone kompaniyasining Rossiya aktivlari egasi Ruslan Alisultanov, KRET mudofaa konserni menejeri Yekaterina Bloxina, FSBning «Vympel» maxsus bo‘linmasi sobiq zobiti Viktor Shendrik, VTB bankining bir qancha katta vitse-prezidentlari, «Gazprom» bankining bir qancha yuqori lavozimli vitse-prezidentlari va Kremlga yaqin bo‘lgan boshqa odamlar bor.

#Serbiya #Kreml