Energiya samardorligi agentligiga direktor tayinlandi

2019 yildan buyon Respublika tovar-xomashyo birjasini boshqarib kelgan Ziyoviddin Badriddinov yangi tashkil etilayotgan Energiya samaradorligi milliy agentligiga rahbar etib tayinlandi. Raqobat qo‘mitasi raisi o‘rinbosari Asadulla Qayumov faoliyatini RTXB raisi sifatida davom ettiradi.

Ziyoviddin Badriddinov / Foto: RTXB

O‘zbekiston prezidentining qarori bilan, Badriddinov Ziyoviddin Bositovich Vazirlar Mahkamasi huzuridagi Energiya samardorligi milliy agentligi direktori etib tayinlandi.

U 2019 yil oktyabrdan buyon Respublika tovar-xomashyo birjasi boshqaruvi raisi lavozimida ishlab kelayotgandi.

Energiya samaradorligi milliy agentligi O‘zbekiston prezidentining 2 apreldagi farmoni asosida tashkil etilmoqda.

Agentlikka energiya samaradorligini oshirish sohasida yagona davlat siyosatini yuritish, sohada rag‘batlantiruvchi va ta’sir etuvchi choralar ishlab chiqish va tartibga solish; energiya tejashdan daromad oluvchi energiya servis kompaniyalari (ESKO) xizmatlari bozorini rivojlantirish va boshqa vazifalar yuklatilgan.

Asadulla Qayumov / Foto: Raqobat qo‘mitasi

Badriddinovning o‘rniga, tovar-xomashyo birjasi raisi lavozimiga Qayumov Asadulla O‘rolovich tayinlandi. U tayinlovga qadar 2022 yildan buyon Raqobat qo‘mitasi raisining birinchi o‘rinbosari, o‘rinbosari lavozimlarida ishlab kelayotgandi.

#energetika #Ziyoviddin Badriddinov