Texasda 8 mln dona tanga avtomobil yo‘liga sochilib ketdi - video

AQSh zarbxonasiga tegishli zirhlangan yuk mashinasi Texasdagi trassada ag‘darilib ketdi, deb xabar beradi New York Post.

Texas shtatining Alvord shahrida noodatiy yo‘l-transport hodisasi sodir bo‘ldi. Sakkiz million dona 10 sentli tangalar avtomobil yo‘liga sochilib ketdi.

Qayd etilishicha, hodisa 29 aprel kuni soat 05:15 da sodir bo‘lgan. Yuk mashinasi 36 tonnadan ortiq yangi zarb qilingan tangalarni olib ketayotgan bo‘lgan. Texas Jamoat xavfsizligi departamenti vakili serjant Xosue De La Serdaning ma’lum qilishicha, haydovchisi burilish joyida boshqaruvni yo‘qotgan va yo‘ldan chiqib ketgan.

Avariya oqibatida haydovchi va yo‘lovchi yengil jarohat olgan, keyinroq ularga shifoxonadan javob berilgan. Ammo tangalar sochilib ketgani sabab avtomobil yo‘li 14 soatga yopishga to‘g‘ri kelgan. Tangalarni yig‘ishga jalb etilgan brigadalar oqava suvlarni tozalashda qo‘llaniladigan vakuum mashinalar foydalanishga majbur bo‘lgan. Ayrim ishchilar belgurak va hatto qo‘lda ham tanga yiqqan.

Yuk mashinasiga egalik qiluvchi kompaniya banklar va davlat idoralari uchun qo‘riqlanadigan yuklarni yetkazib berish bilan shug‘ullanadi. Uning saytida ko‘rsatilishicha, mashinalar zirhlangan va ularga qurolli qo‘riqchilar hamrohlik qiladi.

Mahalliy aholining so‘zlariga ko‘ra, shu kuni shaharda 8 million dollar sochilib ketgani haqida mish-mishlar tarqalgan, ammo aslida sochilgan tangalar qiymati salkam 800 ming dollarni tashkil etgan.