Tramp Putin bilan suhbat haqida: o‘zgarish yo‘q

AQSh prezidenti Donald Tramp Rossiya yetakchisi Vladimir Putin bilan telefon muloqoti chog‘ida Ukrainadagi Rossiya urushini tugatish masalasida hech qanday muvaffaqiyatga erishilmaganini aytdi. Oq uy rahbari 3 iyul, payshanba kuni Vashington yaqinidagi Endryu harbiy bazasida jurnalistlar bilan suhbatlashdi.

«Bu juda uzoq suhbat bo‘ldi, biz ko‘p narsalarni, jumladan, Eron haqida, shuningdek, o‘zingiz bilganingizdek, Ukraina bilan urush haqida gaplashdik. Va men ko‘p narsa olganim yo‘q», dedi Amerika rahbari. «Men u (Putin) bilan hech qanday muvaffaqiyatga erishmadim», — deya qo‘shimcha qildi Tramp.

Bundan tashqari, Amerika yetakchisi AQSh Kiyevga qurol yetkazib berishda davom etayotgani haqida bayonot berdi. «Biz qurol beryapmiz, ular (ukrainaliklar) bilan ishlayapmiz va ularga yordam berishga harakat qilmoqdamiz», — dedi u.

«Bilasizmi, Bayden ularga qurol berib, butun mamlakatimizni xonavayron qildi va bizda ular yetarli ekanligiga ishonch hosil qilishimiz kerak», deb xulosa qildi Tramp.

Kremlga ko‘ra, yanvar oyidan beri Putin va Tramp o‘rtasidagi oltinchi rasmiy telefon muloqoti 3 iyul kuni deyarli bir soat davom etgan.

Siyosatchilar Suriya, Eron va Yaqin Sharqdagi vaziyatni ham muhokama qildi, dedi Rossiya prezidenti yordamchisi Yuriy Ushakov.

Ehtimoliy shaxsiy uchrashuv haqida gap bormadi, ammo Ushakovning so‘zlariga ko‘ra, «bu g‘oya havoda muallaq turibdi».

Avvalgi suhbat iyun oyining o‘rtalarida, Putin Yaqin Sharq bo‘yicha kelishuvda vositachi sifatida o‘z nomzodini taklif qilgan paytda bo‘lib o‘tgan edi. Britaniyaning Financial Times gazetasiga ko‘ra, Tramp 4 iyul kuni Ukraina prezidenti Volodimir Zelenskiy bilan telefon orqali muloqot qiladi. Ukraina rasmiylari AFP agentligiga Kiyevda bu qo‘ng‘iroqqa «tayyorgarlik ko‘rilayotganini» tasdiqladi.