Hindiston qirg‘oqlarida Rossiya nefti yuklangan tankerlar harakatsiz turibdi

Hindiston qirg‘oqlarida Rossiya nefti bo‘lgan kamida to‘rtta tanker harakatsiz turibdi, deb xabar berdi Bloomberg agentligi. Avvalroq AQSh prezidenti Donald Tramp mamlakatning Rossiya energiya resurslarini sotib olishi munosabati bilan Hindistondan tovarlarga 25 foizlik boj solig‘ini e’lon qilgan edi.

Achilles va Elyte kemalari Jamnagar yaqinida langar tashlagan. Ularni Sikka portida yuklarni tushirishi 2 va 3 avgust kunlariga belgilangan edi. Ikkala tanker ham Yevropa Ittifoqi va Buyuk Britaniya tomonidan sanksiyalar ostida. Yana ikkita tanker — Destan va Horae qirg‘oqdan ancha uzoqroqda joylashgan.

Trampning tahdidlaridan so‘ng Hindiston hukumati neftni qayta ishlash zavodlaridan boshqa mamlakatlardan neft sotib olish rejalarini ishlab chiqish va bo‘lishishni so‘radi.

Kuni kecha Hindistondagi to‘rtta neftni qayta ishlash zavodi Rossiya neftini xarid qilishni to‘xtatgani ma’lum bo‘ldi. Gap Hindistondagi barcha neftni qayta ishlash quvvatlarining 60 foizdan ortig‘ini tashkil etuvchi davlatga qarashli neftni qayta ishlash zavodlari haqida bormoqda.