ИИО реабилитация марказларида сақланаётган шахслар “Саховат” уйларига жойлаштирилади

Вазирлар Маҳкамасининг “Ўзбекистон Республикаси Соғлиқни сақлаш вазирлигининг тиббий-ижтимоий муассасалари тўғрисидаги низомларни тасдиқлаш ҳақида” 2011 йил 23 августдаги 240-сон қарорига қўшимчалар киритилиши мумкин. Бу норматив-ҳуқуқий ҳужжатлар муҳокамаси порталида эълон қилинган лойиҳада айтилади.

Вазирлар Маҳкамасининг “Ўзбекистон Республикаси Соғлиқни сақлаш вазирлигининг тиббий-ижтимоий муассасалари тўғрисидаги низомларни тасдиқлаш ҳақида” 2011 йил 23 августдаги 240-сон қарорига киритилиши мумкин бўлган қўшимчалар:

1. 1-илова қуйидаги мазмундаги III-1-боб билан тўлдирилади:

“III-1. Ички ишлар органларининг муайян яшаш жойига эга бўлмаган шахсларни реабилитация қилиш марказларида сақланаётганларни “Саховат” интернат уйларига жойлаштириш

17-1. Ички ишлар органларининг муайян яшаш жойига эга бўлмаган шахсларни реабилитация қилиш марказлари (кейинги ўринларда реабилитация марказлари деб аталади)да сақланаётган мазкур Низомнинг 11-бандида кўрсатилган шахслар “Саховат” интернат уйларига жойлаштирилади.

“Саховат” интернат уйларига жойлаштириш учун юбориш реабилитация маркази бошлиғининг буйруғи асосида Ўзбекистон Республикаси Соғлиқни сақлаш вазирлигининг Махсус комиссияси қарорига мувофиқ амалга оширилади.

17-2. Реабилитация марказларидан “Саховат” интернат уйларига юборилаётганлар мазкур Низомнинг 11–12-бандларида кўрсатилган кўрсаткичлар бўйича тиббий кўрикдан ўтказилади.

Тиббий кўрик реабилитация марказлари тиббиёт ходимлари ва тегишли мутахассис шифокорлар томонидан амалга оширилади. Тиббий кўрик натижалари бўйича ёзма хулоса расмийлаштирилади.

17-3. Реабилитация марказларида сақланаётган шахсларни “Саховат” интернат уйларига жойлаштириш учун қуйидаги ҳужжатлар тақдим этилади:
“Саховат” интернат уйларига жойлаштириш тўғрисида реабилитация марказида сақланаётган мазкур Низомнинг 11-бандида кўрсатилган шахсларнинг реабилитация маркази бошлиғи номига берилган аризаси;

“Саховат” интернат уйига расмийлаштирилаётган шахснинг шахси тўғрисидаги маълумотлар;

“Саховат” интернат уйларига жойлаштирилаётган шахснинг соғлиғи ҳолати бўйича тиббий хулоса;

ҳудудий тиббиёт бошқармасидан олинган руҳий-асаб касалликлари, силга қарши курашиш, онкологик ҳамда тери-таносил касалликлари диспансерларининг хулосалари;

“Саховат” интернат уйига жойлаштирилаётганнинг 2 та (6 см х 4 см ҳажмли) фотосурати;

“Саховат” интернат уйига расмийлаштирилаётганнинг ногиронлиги аниқланган тақдирда белгиланган тартибда тиббий-меҳнат эксперт комиссияси томонидан берилган ногиронлик тўғрисидаги маълумотноманинг нусхаси ҳам тақдим этилади.

Мазкур бандда кўрсатилган барча ҳужжатлар реабилитация марказлари томонидан тўпланади.

17-4. Реабилитация марказларида “Саховат” интернат уйларига жойлаштирилаётган ҳар бир шахс учун икки нусхада шахсий йиғмажилд юритилади, унга ушбу Низомнинг 17-3-бандида санаб ўтилган ҳужжатлар тикиб қўйилади.

“Саховат” интернат уйларига жойлаштирилаётганларнинг шахсий йиғмажилдлари бир нусхаси сақлаш учун “Саховат” интернат уйи директорига белгиланган тартибда тақдим этилади”.

2-илова қуйидаги мазмундаги III-1-боб билан тўлдирилади:

“III-1. Реабилитация марказларида сақланаётганларни “Мурувват” интернат уйларига жойлаштириш

19-1. Реабилитация марказларида сақланаётган мазкур Низомнинг 13-бандида кўрсатилган шахслар “Мурувват” интернат уйларига жойлаштирилади.

“Мурувват” интернат уйларига жойлаштириш учун юбориш реабилитация маркази бошлиғининг буйруғи асосида Ўзбекистон Республикаси Соғлиқни сақлаш вазирлигининг Махсус комиссияси қарорига мувофиқ амалга оширилади.

19-2. Реабилитация марказларидан “Мурувват” интернат уйларига юборилаётганлар мазкур Низомнинг 13–14-бандларида кўрсатилган кўрсаткичлар бўйича тиббий кўрикдан ўтказилади.

Тиббий кўрик реабилитация марказлари тиббиёт ходимлари ва тегишли мутахассис шифокорлар томонидан амалга оширилади. Тиббий кўрик натижалари бўйича ёзма хулоса расмийлаштирилади.

19-3. Реабилитация марказларида сақланаётганларни “Мурувват” интернат уйларига жойлаштириш учун қуйидаги ҳужжатлар тақдим этилади:
“Мурувват” интернат уйига расмийлаштирилаётган шахснинг шахси тўғрисидаги маълумотлар;

“Мурувват” интернат уйларига жойлаштирилаётган шахснинг соғлиғи ҳолати бўйича тиббий хулоса;

ҳудудий тиббиёт бошқармасидан олинган руҳий-асаб касалликлари, силга қарши курашиш, онкологик ҳамда тери-таносил касалликлари диспансерларининг хулосалари;

“Мурувват” интернат уйига жойлаштирилаётганнинг 2 та (6 см х 4 см ҳажмли) фотосурати;

белгиланган тартибда тиббий-меҳнат эксперт комиссияси томонидан берилган ногиронлик тўғрисидаги маълумотноманинг нусхаси.

Мазкур бандда кўрсатилган барча ҳужжатлар реабилитация марказлари томонидан тўпланади.

19-4. Реабилитация марказларида “Мурувват” интернат уйларига жойлаштирилаётган ҳар бир шахс учун икки нусхада шахсий йиғмажилд юритилади, унга ушбу Низомнинг 19-3-бандида санаб ўтилган ҳужжатлар тикиб қўйилади.

“Мурувват” интернат уйларига жойлаштирилаётганларнинг шахсий йиғмажилдлари бир нусхаси сақлаш учун “Мурувват” интернат уйи директорига белгиланган тартибда тақдим этилади”.