Интерпол раҳбари қийноқлар қўллашда айбланди

Генерал Аҳмад Носир ар-Раисий устидан Франция миллий антитерроризм прокуратурасига (PNAT) шикоят берилган.

Фото: AP

Интерполнинг янги президенти - генерал Аҳмад Носир ар-Раисий Бирлашган Араб Амирликларидаги маҳбусларга нисбатан қийноқлар қўллаш ва уларга ноинсоний муносабатда бўлишда айбланди, деб ёзади ABC News.

Хабар қилинишича, унинг устидан Франция миллий антитерроризм прокуратурасига (PNAT) шикоят берилган. Жабрланувчилардан бири Аҳмад Мансур “Форс кўрфази мамлакатларидаги инсон ҳуқуқлари бўйича марказ” (GCHR) ноҳукумат ташкилоти орқали ар-Раисийга қарши даъво киритган.

Маълумот берилишича, Интерпол раҳбари Франциянинг Лион шаҳрида туради (бу ерда Интерпол бош қароргоҳи жойлашган), бу эса Францияда суд жараёнини бошлаш учун етарли ҳисобланади. Ҳуқуқ ҳимоячиларининг фикрига кўра, Франция ҳукумати зудлик билан тергов ишларини бошлаши керак.

ABC News нашрининг эслатишича, GCHR илгари ар-Раисийга нисбатан шикоят берган, аммо шикоят рад этилган: ўша пайтда ар-Раисий Франция ҳудудида истиқомат қилмаган.

#Интерпол #қийноқ