Эстония ва Гуржистоннинг Ўзбекистондаги янги элчилари тайинланди

Яап Ора Эстониянинг Ўзбекистондаги янги элчиси этиб тайинланди. Бу ҳақда ТИВ раҳбари Бахтиёр Саидов маълум қилди.

Қайд этилишича, ташқи ишлар вазири элчи Яап Орадан ишонч ёрлиқларини қабул қилиб олган.

«Ўзбекистон ва Эстония ўртасидаги икки ва кўп томонлама муносабатларнинг ҳозирги динамикасини муҳокама қилдик. Иқтисодий дипломатия, ахборот технологиялари, халқлар ўртасидаги алоқалар, маданият ва бошқа соҳалардаги ҳамкорлигимизни ривожлантиришга алоҳида эътибор қаратдик», — деб ёзади Бахтиёр Саидов.

Шунингдек, ТИВ раҳбари Давид Котариани Гуржистоннинг Ўзбекистондаги фавқулодда ва мухтор элчиси этиб тайинлангани билан табриклади ва ундан ҳам ишонч ёрлиқлари нусхаларини қабул қилиб олди.

«Мамлакатларимиз ўртасидаги икки томонлама алоқаларни кенгайтириш йўлларини муҳокама қилиб, ҳамкорликнинг устувор йўналишларини белгилаб олдик. Ташқи ишлар вазирлиги жаноб элчини Ўзбекистонда самарали дипломатик миссиясини амалга оширишда ҳар томонлама қўллаб-қувватлашга тайёрдир», — дейди Саидов.