Ироқда кучли қум бўронлари кузатилмоқда. Мамлакатда авиақатновлар тўхтатилди

Ироқнинг марказий ва жанубий ҳудудларига ёпирилган қум бўронлари аҳоли саломатлигида жиддий муаммолар келтириб чиқарди ҳамда транспорт қатновларида узилишларни юзага келтирди.

Мамлакат Соғлиқни сақлаш вазирлиги маълумотларига кўра, 3,7 мингдан ортиқ одам нафас олиш йўллари асоратлари билан тиббий ёрдам сўраб мурожаат қилган, улардан 1800 дан ортиғи шифохоналарга ётқизилган. Мусанно вилоятида эса бўғилиш билан боғлиқ 700 га яқин ҳолат қайд этилган.

Маҳаллий ОАВнинг ёзишича, шаҳарларни қоплаган қалин чанг кўрувчанлик масофасини 1 километргача чеклаган. Қатор туманларда электр энергияси таъминотида узилишлар кузатилмоқда. Нажаф ва Басрадаги аэропортлар вақтинчалик фаолиятини тўхтатган.

Фавқулодда хизмат ходимлари ва фуқаролар кўчалар бўйлаб ҳаракатланиш вақтида чангдан ҳимояланиш мақсадида ниқобдан фойдаланишга мажбур бўлмоқда.

Ироқда қум бўронлари тез-тез кузатилиб туради, аммо экспертларнинг таъкидлашича, иқмлик ўзгариши фонида уларнинг даврийлиги ошмоқда. БМТ ушбу мамлакатни дунёдаги энг заиф бешта давлат қаторига киритган — Ироқда мунтазам бўронлар билан бирга жазирама ва сув ресурсларнинг етишмаслиги ҳам кузатилади.

Мамлакатда бундан олдинги йирик қум бўронлари 2022 йилда содир бўлганди. Ўшанда бир киши ҳалок бўлган, 5 мингдан ортиқ инсон шифохонага ётқизилган эди. Ироқ Экология вазирлиги чангли кунлар мамлакатнинг янги реаллигига айланиб бораётганидан огоҳлантирмоқда.