Судан: RSF муқобил ҳукумат ташкил этилишини эълон қилди

Тезкор ҳаракат кучлари (RSF) Суданда муқобил ҳукумат тузилишини эълон қилди. RSF раҳбарининг сўзларига кўра, гап «параллел давлат» ҳақида эмас, балки Судан учун «ягона мумкин бўлган келажак» ҳақида кетмоқда.

Фото: AFP

Суданда фуқаролар уруши бошланганидан икки йил ўтиб, ҳарбий хунтага қарши бўлган Тезкор ҳаракат кучлари (RSF) мамлакатда муқобил ҳукумат ташкил этилишини эълон қилди. Бу ҳақда RSF етакчиси Муҳаммад Ҳамдан Дагалонинг 15 апрел, сешанба куни Telegram-каналида эълон қилинган баёнотида айтилган.

«Биз тинчлик ва бирдамлик ҳукумати – Суданнинг асл қиёфасини акс эттирувчи кенг коалиция ташкил этилганини фахр билан эълон қиламиз», — деди Дагало Судан халқига олти саҳифалик мурожаатида. Ҳужжатда гап «параллел давлат» яратиш ҳақида эмас, балки Судан учун «ягона мумкин бўлган келажак» ҳақида кетаётгани таъкидланган.

Хусусан, Дагало раҳбари «янги валюта» ва «янги шахсий гувоҳномалар» чиқарилишини эълон қилди. Дагалонинг сўзларига кўра, янги ҳукумат «мамлакат бўйлаб» асосий давлат хизматларини, жумладан таълим, соғлиқни сақлаш ва адлия тизимини таъминлайди.

Суданда RSF ҳамда қўмондон ва Ўтиш даври суверен кенгаши раҳбари генерал Абдел Фаттоҳ ал-Бурхон бошчилигидаги Судан армияси ўртасида икки йилдан бери ҳокимият учун қонли кураш давом этмоқда. БМТ маълумотларига кўра, можаро аллақачон ўн минглаб одамларнинг ҳаётига зомин бўлган ва 12 миллиондан ортиқ киши уй-жойини тарк этган. Ҳар икки томон — армия ва RSF — уруш жиноятларини содир этишда айбланмоқда.

#Судан #RSF