Қимматлашаётган олтин. Кейинги прогнозлар қандай?

Иқтисодий беқарорлик ва ноаниқликлар кучайиб бораётгани фонида олтин нархи қимматлашишда давом этяпти. Йирик молия институтлари ҳам ўз прогнозларини янгилади. Goldman Sachs кутилмаларига кўра нархлар 2025 йил охирига қадар 3700 долларга, UBS кутилмаларига кўра эса 3500 долларга етиши мумкин.

Фото: Matthias Schrader / AP

АҚШ президенти Доналд Трамп томонидан Хитойга нисбатан янги тарифлар жорий этилиши ва Хитойнинг жавоб чораси сифатида АҚШ маҳсулотларига божлар қўйиши глобал иқтисодий ноаниқликни кучайтирди. Бу эса сармоядорларнинг олтинга инвестиция киритишини қўллаб-қувватлаяпти.

АҚШ долларининг бошқа валюталарга нисбатан қадрсизланиши олтинни хорижий инвесторлар учун арзонлаштирди, бу эса қимматбаҳо металлга талабни оширди. Марказий банклар, айниқса, ривожланаётган давлатлар ўз резервларини диверсификация қилиш мақсадида олтин харидларини оширяпти.

Йил бошидан бери олтин нархи қарийб 26 фоизга қимматлашди. 2025 йил 17 апрел Тошкент вақти билан 16:00 ҳолатига кўра, қимматбаҳо металлнинг 1 троя унцияси 3327 долларгача қимматлашди.

Кутилмалар

Bloomberg’нинг ёзишича, Goldman Sachs 2025 йил учун олтин прогнозини янгилади. Таҳлилчи Лина Томас бошчилигидаги гуруҳ нархлар 2025 йил охирига қадар 3700 долларга, 2026 йил ўрталарига келиб эса 4000 долларга етишини прогноз қиляпти. Бунда марказий банклар томонидан ойига ўртача олтин хариди 70 тоннадан 80 тоннага етиши мумкинлиги қайд этилган. Шунингдек, иқтисодий пасайиш эҳтимоли ҳам 45 фоиз дея баҳоланган.

UBC ҳам 2025 йил декабрига қадар нархларнинг 3500 долларгача ўсишини кутяпти. Савдо урушлари ва геосиёсий танглик олтинга "хавфсиз бошпана" сифатида талабнинг ошишини рағбатлантирган.

Шунингдек, 2025 йилнинг биринчи чорагида олтин билан боғлиқ ETF’ларга 226,5 метрик тонна олтин қўшилди, бу эса нархнинг ошишига олиб келган.

Олтин нархининг қимматлашиши Ўзбекистон учун қай даражада муҳим?

Биринчидан, жорий йил 1 апрел ҳолатига Ўзбекистон расмий захираларининг қарийб 77 фоизи олтин ҳиссасига тўғри келган. Олтин нархининг қимматлашиши мамлакат валюта захиралари қийматини оширади.

Иккинчидан, Ўзбекистон энг йирик олтин ишлаб чиқарувчи ва уни экспорт қилувчи мамлакатлардан биридир. Хусусан, 2022 йилда 4,1 млрд долларлик, 2023 йилда эса 8,2 млрд долларлик, 2024 йилда эса 7,5 млрд долларлик олтин сотилган. Олтин нархининг ошиши экспортдан тушадиган даромадларни кўпайтириб, ташқи савдо балансига ижобий таъсир кўрсатади ва бюджет тақчиллиги камайишига ёрдам бериши мумкин.

Учинчидан, олтин нархининг ошиши доллар ва бошқа валюталарга нисбатан сўмнинг қадрсизланишини тўхтатади ёки секинлаштиради.

#прогноз #олтин