SpaceX АҚШнинг «Олтин гумбаз»и учун сунъий йўлдошларни учириш бўйича шартномани қўлга киритиши мумкин

Илон Маскнинг SpaceX компанияси ва унинг икки шериги янги авлод «Олтин гумбаз» ракеталарга қарши тизимини яратишга асосий номзодларга айланди. Бу ҳақда ўз манбаларига таяниб, Reuters хабар берди. Мазкур тизимни ишлаб чиқишни АҚШ президенти Доналд Трамп буюрган эди.

Агентликнинг ёзишича, ракеталар ва сунъий йўлдошлар ишлаб чиқиш билан шуғулланувчи SpaceX компаниясининг потенциал ҳамкорлари сифатида дастурий таъминот соҳасидаги Palantir ва учувчисиз учиш аппаратлари ишлаб чиқарувчиси Anduril компаниялари ҳам иштирок этаётган қўшма тендер тайёрланмоқда. Манбаларга кўра, сўнгги уч ҳафта ичида ушбу компаниялар вакиллари Доналд Трамп маъмурияти ва Пентагоннинг юқори мартабали амалдорлари билан учрашувлар ўтказган.

Reuters манбаларининг айтишича, SpaceX лойиҳа учун «обуна асосида сервис» форматини таклиф қилган: ҳукумат сунъий йўлдош тизимидан фойдаланиш ҳуқуқи учун тўлов қилади, бироқ уни бевосита бошқармайди. Бу эса Пентагоннинг баъзи протоколларига амал қилмасликка имкон беради ва тизимни яратишни тезлаштиради. Бироқ бу ҳолатда Мудофаа вазирлиги лойиҳа устидан назорат ва нарх сиёсатини йўқотади. Пентагоннинг айрим амалдорлари SpaceX таклифига шубҳа билан қарамоқда.

«Олтин гумбаз» — ракеталарга қарши янги авлод мудофаа тизими бўлиб, унинг доирасида ракеталарни тутиб қолувчи воситалар космосга чиқарилади. Мақсад — АҚШ ҳудудини ҳар қандай ракета таҳдидидан тўлиқ ҳимоя қилиш. Доналд Трамп бу лойиҳа яратиш ҳақидаги фармонни 28 январ куни имзолаган. Пентагонга ушбу «Олтин гумбаз»ни ишлаб чиқиш ва қуришда ёрдам бериш истагини билдирган 180 дан ортиқ компания мурожаат қилган. Лойиҳа қиймати юзлаб миллиард долларга етиши мумкин. SpaceX эса дастлабки муҳандислик ва лойиҳалаш ишларини 6 миллиарддан 10 миллиард долларгача баҳолаган.