Трамп маъмурияти Хитойнинг DeepSeek чатботини АҚШда блоклаш масаласини муҳокама қилмоқда

АҚШ ҳукумати Хитойнинг DeepSeek чатботи ва Американинг яримўтказгичлар ишлаб чиқарувчи етакчи компанияси Nvidia’га (DeepSeek’да айнан ушуб компания чипларидан фойдаланилган) қарши чораларни муҳокама қилмоқда. Бу ҳақда The New York Times газетаси ўз манбаларига таяниб хабар берди.

АҚШ президенти Доналд Трамп маъмурияти аллақачон Nvidia чипларининг Хитойга сотилишини чеклаган. Шунингдек, ҳукумат DeepSeek’ка Америка технологияларини харид қилиш имконини бермайдиган санкцияларни жорий этиш ва америкаликларга DeepSeek’дан фойдаланишни тақиқлаш имкониятларини кўриб чиқмоқда.

Таъкидланишича, конгресс ҳам Nvidia’га босим ўтказмоқда. Вакиллар палатасининг Хитой коммунистик партияси ишлари бўйича махсус қўмитаси 16 апрел куни Nvidia DeepSeek’ка чиплар етказиб бериш орқали Америка қоидаларини бузган ёки бузмаганини аниқлаш бўйича тергов бошлаган. Бу конгресснинг Nvidia’га нисбатан биринчи тергови ҳисобланади.

Nvidia вакили Жон Риццо компания АҚШ ҳукуматининг қайси маҳсулотлар ва қаерда сотилиши мумкинлиги борасидаги кўрсатмаларига риоя қилганини билдирди.

Оқ уй ва АҚШ савдо вазирлиги DeepSeek’нинг айрим тадқиқотчилари Хитой армияси ҳамда бошқа тузилмаларга алоқадор эканидан хабар топганидан кейин Nvidia’га нисбатан таъқиб бошланган. DeepSeek вакиллари бу борадаги сўровларга жавоб қайтармаган.

DeepSeek компанияси январ ойида DeepSeek-V3 номли янги сунъий интеллект тизимини тақдим этганди. Компания вакилларининг қайд этишича, модел икки ой давомида такомиллаштирилган ва унга 6 миллион доллардан камроқ маблағ сарфланган — Америка компаниялари эса бу каби йўналишларга ўнлаб баробар кўп харажат қилмоқда.