Рим папаси вафот этди

Рим папаси Франциск 2025 йил 21 апрел куни, Ватикандаги қароргоҳи — Каса-Санта-Мартада оламдан ўтди. У 88 ёшда эди.

Кардинал Кевин Фаррелл Ватикан телеканали орқали папанинг ўлими ҳақида расман хабар берган.

«Азиз биродарлар ва опа-сингиллар, чуқур қайғу билан муқаддас отамиз Францискнинг вафот этганини эълон қилишга мажбурман. Бугун эрталаб соат 7:35 да (маҳаллий вақт билан) Рим епископи Франциск Ота уйига қайтди. Унинг бутун ҳаёти Худога ва унинг черковига хизмат қилишга бағишланганди. У бизни Инжил қадриятлари билан, айниқса, аҳолининг энг камбағал ва маргинал қатламларига нисбатан садоқат, жасорат ва умумий муҳаббат билан яшашга ўргатди», — дейилади Vatican News портали хабарида.

Франциск (Рим папаси бўлишидан олдин Хорхе Марио Берголо) 2013 йил мартида Рим папалигига сайланган ва католик черковининг Лотин Америкадан чиққан биринчи раҳбари бўлганди. У бу лавозимга саломатлигидаги муаммолар туфайли тахтдан воз кечган Бенедикт XVI ўрнига келганди.

У ўз понтификати давомида адолат, муҳит муҳофазаси ва камбағаллар ҳуқуқларини ҳимоя қилишни асосий вазифа қилиб белгилаганди.

2025 йил феврал ойи ўрталарида Рим папаси Франциск бронхит ташхиси билан шифохонага ётқизилганди. Кейинроқ унинг ҳолати кескин оғирлашган — унда икки томонлама пневмония аниқланган ва бир неча бор сунъий нафас олдириш аппаратига уланганди. Кардинал Жанфранко Равази «агар папалик вазифаларини бажариш билан боғлиқ мураккабликлар юзага келадиган бўлса», Франциск тахтдан воз кечиши мумкинлигини айтганди.

23 март куни Франциск 38 кун давомида шифохонада қолганидан кейин Ватиканга қайтганди. 20 апрел куни у Ватикандаги Авлиё Пётр майдонига йиғилган жамоат қаршисида кўриниш бериб, уларни Пасха билан табриклаганди.

Рим папаси ўз нутқида «Ғазо секторида зудлик билан ўт очишни тўхтатиш, гаровдаги [исроиллик]ларни озод этиш ва ғазоликларга инсонпарварлик ёрдами етказиб бериш»га чақирган, шунингдек, Украина масаласига тўхталиб, «барча томонлар»ни «адолатли ва мустаҳкам тинчлик»ка эришиш йўлидаги саъй-ҳаракатларни давом эттиришга чақирганди.

Яқин кунларда Ватиканда янги папани сайлаш учун конклав чақирилиши кутилмоқда.