Имтиҳонга кеч қолган талаба авиакомпанияни судга бериб, унда ютиб чиқди

Санкт-Петербург—Истанбул авиарейсига кеч қолган талаба «Аэрофлот» авиакомпаниясини судга берди. Йўловчи Туркияга учадиган рейсга чиқарилмаган, деб хабар беради шаҳар судларининг бирлашган матбуот хизмати. 

Қайд этилишича, даъвогар Санкт-Петербургда яшовчи Роберт Пучков ҳисобланади. У рейсга чипта олган ва аэропортга ўз вақтида келган. Аммо уни Туркияга кириш рухсатини берадиган ҳужжати йўқлиги сабаб рўйхатдан ўтишга қўйишмаган.

Йигит паспорти, талабалар учун мўлжалланган яшаш гувоҳномасини тақдим этган ва имтиҳонга кетаётганини айтган. Барча керакли ҳужжатлар мавжудлигига қарамай, авиакомпания уни олиб кетишдан бош тортган.

«Ташиш тўғрисидаги шартнома бир томонлама тартибда бузилган, даъвогарга тўланган пул маблағлари қайтарилмаган. У имтиҳон топшириш учун учиши кераклиги боис Санкт-Петербург—Дубай—Истанбул йўналиши бўйича авиачипта харид қилган ва манзилга етиб келган», — дейилади хабарда.

Шундан кейин талаба компаниядан 121 минг рубл (1500 доллар) компенсация тўлашини талаб қилган. Ушбу сумма ичига Истанбулгача бўлган тўғридан-тўғри рейс чиптаси нархи, Дубайга қўниш орқали олинган чипта нархи, такси учун тўланган пуллар ва 30 минг рубл миқдорида маънавий зарар ҳам киритилган.

Суд даъвогар тарафида бўлиб, Пучков фойдасига авиачипта учун 34,7 минг рубл, жами 68,9 минг рубл миқдоридаги етказилган зарар, 5 минг рубл миқдорида маънавий зарар учун компенсация ундирилиши бўйича қарор чиқарган. Шунингдек, суд компанияга 54 минг рубл жарима тўлаш мажбуриятини юклаган.