Жуда афсусдамиз – Европа етакчилари Истанбулда ўтган Россия-Украина музокараларига изоҳ берди

Германия, Франция ва Буюк Британия етакчилари Истанбулда ўтган Россия-Украина музокаралари якунларидан афсусда эканини яширмади.

Германия канцлери Фридрих Мерц: «Зеленский билан биргаликда Россия шу ҳафта ўт очишни тўхтатишга олиб келувчи тинчлик шартномаси бўйича биринчи музокараларни ўтказиш учун яхши имкониятга эга эканига якдил эдик. Бу юз бермаганидан жуда афсусдамиз».

Франция президенти Эммануэл Макрон: «Биз президент Трамп билан Украина ва европаликлар томонидан қўллаб-қувватланган америкаликлар қўйган талабларга Россиянинг жавоб бермаслигини қабул қилиб бўлмас эканини муҳокама қилдик. Ўт очишни тўхтатиш ва қарор қабул қилиш даражасидаги ҳеч қандай учрашув бўлмади».

Буюк Британия бош вазири Кир Стармер: «Россиянинг позициясини қабул қилиб бўлмайди ва бу биринчи марта юз бермаяпти. Шу туфайли президент Зеленский билан учрашамиз ва президент Трамп билан музокаралар давомида жавобларимизни яқиндан мувофиқлаштирамиз ва бу амалиётни давом эттирамиз».

Польша бош вазири Доналд Туск: «Россия томони эзгу ирода кўрсатмади, америкаликлар олдида музокара ўтказишни истамади ва қабул қилиб бўлмайдиган шартларни қўйди».

Хабар қилинишича, музокаралар якунида Европа етакчилари, шунингдек, Украина президенти Владимир Зеленский Россия ва Украина делегацияларининг Туркиядаги учрашувини АҚШ президенти Доналд Трамп билан муҳокама қилган.

Зеленскийнинг сўзларига кўра, Украина ҳақиқий тинчлик учун «тезкор қадамлар ташлашга» тайёр.

«Бизнинг позициямиз шундан иборатки, агар россияликлар тўлиқ ва сўзсиз ўт очишни тўхтатиш ва қотилликларга барҳам беришдан бош тортса, у ҳолда кучли санкциялар бўлиши керак. Россияга нисбатан босим Россия урушни тугатишга тайёр бўлгунга қадар давом этиши керак», деди Украина президенти.

Полша бош вазири Доналд Туск Трамп билан суҳбатдан сўнг, Россия томони «де-факто музокараларни тўхтатганини ва ўт очишни тўхтатишдан бош тортганини» айтди. «Босимни ошириш вақти келди», деб қўшимча қилди у.

Украина дипломатик манбасининг айтишича, Россиянинг Истанбулдаги музокаралари чоғида қўйган талаблари «реал эмас» ва аввалроқ муҳокама қилинганидан ҳам ошиб кетган. Олий Рада депутати Олексий Гончаренконинг таъкидлашича, Россия «ўз Конституциясига киритилган барча ҳудудлардан» Украина қўшинларини олиб чиқишни талаб қилган.