Ню Йоркда Мексика ҳарбий кемаси Бруклин кўпригига урилди. Қурбонлар бор

Тўқнашувда кеманинг учала мачтаси ҳам шикастланган ва қулаб тушган.

«Айни дамда бортда бўлган 277 кишидан 19 нафари жароҳат олган, улардан 2 нафари оғир аҳволда қолмоқда, яна 2 нафари, афсуски, олган жароҳатларидан вафот этган», – деб ёзди Ню Йорк мэри Эрик Адамс X ижтимоий тармоғида.

Интернетда эълон қилинган видеода елканлари йиғиштирилган ва такелажда байрам чироқлари ёқилган кема кўприк остидан ўтишга урингани ва мачталар кўприкка урилиб, Ист-Риверга қулаганини кўриш мумкин.

Ҳодиса рўй бериши арафасида юзлаб томошабинлар сешанбадан бери Манҳэттеннинг жанубий қисмидаги бандаргоҳда турган кема билан хайрлашиш учун йиғилганди.

Мексика ҳарбий-денгиз кучлари баёнотида ҳалокат оқибатида экипажнинг икки аъзоси ҳалок бўлгани, яна 22 киши яралангани, уларнинг ярми – оғир аҳволда экани қайд этилган.

Мексика ҳарбий-денгиз кучлари ҳеч ким сувга тушиб кетмагани ва қутқарув операцияси ўтказилмаганини маълум қилди.

Мексика президенти Клаудия Шейнбаум X’даги саҳифасида экипажнинг икки аъзоси ҳалок бўлганидан «чуқур қайғуда» эканини ёзган.

Кема тахминан соат 20:20 атрофида (якшанба куни Гринвич бўйича 00:20) капитан манёвр қилганида ҳаракатни йўқотган ва уни Бруклин томонидаги кўприк таянчига олиб борган, деди матбуот анжуманида Ню Йорк полициясининг махсус операциялар бўлими бошлиғи Уилсон Арамболес.

«Кемада ваҳима ҳукм сурарди. Бақир-чақир бўлди, баъзи денгизчилар мачталарда осилиб туришарди», – деди AFP’га сув яқинида турган бруклинлик 23 ёшли Ник Корсо.

Бруклиндан Манҳэттенга олиб борувчи кўприк 40 дақиқага ёпилган, шундан сўнг у қайта очилган.

«Текширув давом этаётган бўлса-да, Бруклин кўпригида жиддий шикастланиш аломатлари йўқ», – дейилади Ню Йорк транспорт департаменти хабарида.

Мексика элчиси Эстебан Моктесум Барраган жабрланганлар шифохонага етказилганини маълум қилган.

Елканли кема Манҳэттен кўприги ҳудудига олиб кетилди ва Ню Йорк полиция департаменти аҳолига «қатнов кўплиги» ва «тез ёрдам машиналари гавжумлиги» сабабли бу ҳудуддан келмасликни тавсия қилди.

Cuauhtemoc’нинг мачталари баландлиги 48,2 метрга етади.

Мексика Ҳарбий денгиз кучлари баёнотида айтилишича, кема 6 апрел куни Акапулкодан сафарга чиққан. Унинг вазифаси «денгизчилик руҳини ошириш, ҳарбий-денгиз таълимини мустаҳкамлаш ҳамда Мексика халқининг тинчлик ва эзгулик ҳақидаги мурожаатини денгизлар ва портларга етказиш» бўлган. Кема Ню Йоркка, ундан сўнг эса Исландия, Шотландия, Испания ва Буюк Британияга бориши режалаштирилган эди.

Ню Йорк шаҳар фавқулодда вазиятлар бошқармаси вакилига кўра, Бруклин кўпригидан бироз пастроқда жойлашган 17-пирсга боғланган кема Ню Йорк портидан чиқиб, жануб томон сузиши керак бўлган. Бироқ бунинг ўрнига у нотўғри йўналишда ҳаракатланган.

Мазкур кема 1982 йилда қурилган бўлиб, у Ню Йоркда кейинги йилга режалаштирилган ва АҚШ мустақиллигининг 250 йиллигига бағишланган тадбирга тайёргарлик кўриш учун ўқув сафари доирасида эди.

Бу сўнгги 14 ой ичида АҚШдаги кўприк билан кема тўқнашуви оқибатида инсонлар ҳалок бўлиши билан боғлиқ иккинчи ҳолатдир. 2024 йил март ойида кема Балтимордаги кўприкка урилиши оқибатида олти нафар ишчи ҳалок бўлди.