Samsung Display Россия металларини сотиб олишни тўхтатди

Дисплей ишлаб чиқарувчи Samsung Display Россия олтини, волфрами ва танталидан фойдаланишни тўхтатди, деб ёзади «Коммерсант». 2021 йилда компания 11 та россиялик етказиб берувчи билан ишлаган, бироқ 2024 йилда уларни занжирдан чиқариб ташлаган.

Фото: Getty Images

Жанубий Кореянинг Samsung компанияси шуъба корхонаси Samsung Display2024 йилда россиялик етказиб берувчилардан олтин, волфрам ва тантал сотиб олишни тўхтатди. Бу ҳақда 27 май, сешанба куни компания молиявий ҳисоботларига таяниб, «Коммерсант» газетаси хабар берди.

Нашр маълумотларига кўра, 2022 ва 2023 йиллар учун ушбу металларни етказиб бериш ҳақидаги маълумотлар яширилган, 2021 йилда компания Россиянинг 11 корхонасидан олтин, волфрам ва тантал олган. Улар орасида Соликамск магний заводи ҳам бор, у тантални Samsung Display'га тўғридан тўғри етказиб бермаганлигини таъкидлади, аммо, эҳтимол, бу воситачилар томонидан амалга оширилган бўлиши мумкин.

Россия маълумотларни сақлаш тизимларини ишлаб чиқувчилар консорциуми директори Олег Изумрудов Samsung иккиламчи санкциялардан қочиш учун Россия хомашёсини воситачилар орқали сотиб олишда давом этаётганини тан олди. Унинг ҳисоб-китобларига кўра, етказиб бериш занжирларининг чўзилиши туфайли маҳсулот таннархи 2-5 фоизга ошиши мумкин.

Шу билан бирга, электроника ишлаб чиқарувчилари орасида «Коммерсант» манбасининг таъкидлашича, Samsung Россия металларидан бутунлай воз кечиб, осиёлик етказиб берувчиларга ўтган. Samsung ва Samsung Display расмий вакиллари нашр сўровига жавоб бермади.

#Samsung #Россия #металл