NYT: Трамп дунёни АҚШ, Россия ва Хитой ўртасида бўлиш ниятида

АҚШ президенти Доналд Трампнинг сўнгги ҳаракатлари ва баёнотлари унинг дунёни АҚШ, Россия ва Хитой ўртасидаги таъсир доираларига бўлиш истагидан далолат беради. Бу ҳақда 26 май, душанба куни The New York Times (NYT) хабар берди. «Трамп Россия ва Хитой билан боғлиқ каттароқ нарсани назарда тутган бўлиши мумкин ва бу якуний келишув бўлади. Айрим ташқи сиёсат таҳлилчиларининг айтишича, унинг ҳаракатлари ва баёнотлари у учта буюк давлат деб аталмиш АҚШ, Хитой ва Россиянинг ҳар бири ер шарининг ўзига хос қисмида ҳукмронлик қиладиган дунёни тасаввур қилиши мумкинлигидан далолат беради», дейилади мақолада. Нашр муаллифларининг таъкидлашича, дунёнинг бундай қайта бўлиниши «XIX аср императорлик бошқаруви услубига қайтиш бўларди».

NYT Америка президентининг Гренландияни Даниядан тортиб олиш, Канадани қўшиб олиш ва Панама канали устидан тўлиқ назоратни тиклаш истагини эслатди. «АҚШнинг Ғарбий яримшарда ҳукмронлигини кенгайтиришга уринишлари унинг Америка таъсир доирасини яратиш истагининг энг ёрқин белгисидир», деб ёзади газета. Бундан ташқари, ўтган ҳафта Трамп Россия билан савдо алоқаларини тиклаш ва «ўзининг глобал савдо уруши оқибатларини чеклаш» истагини билдирди ҳамда Хитой етакчиси Си Жинпингни у билан боғланишга чақирди, дейилади мақолада.

Ўз навбатида, Politico 27 май куни Доналд Трампнинг 9 июлгача Европа товарларига 50 фоизлик божлар жорий этиш билан таҳдид қилганига қарамай, АҚШ ва ЕИ катта эҳтимол билан янги савдо келишуви бўйича келиша олмаслигини ёзди.