Глобал исиш туфайли Ла-Маншга саккизоёқлар ёпирилди

Шимолий Атлантика сувлари ҳароратининг сезиларли даражада кўтарилиши Ла-Манш бўғозига саккизоёқлар ёпирилишига олиб келди. Маҳаллий балиқчилик компаниялари саккизоёқ ови ўтган йил билан таққослаганда 200 фоиздан зиёдга ошганини маълум қилмоқда.

Bloombergʼнинг ёзишича, ушбу ўзгаришлар эколог ва биологлар орасида хавотир уйғотмоқда. Май ойида Ирландия қирғоқларининг ғарбий қисмидаги сув ҳарорати меъёрдан 4 даражага ошган, Буюк Британия қирғоқларида эса — 2,5 даражага кўтарилган. Бу бутун тадқиқот давомидаги рекорд кўрсаткич ҳисобланади. Экспертлар августга бориб сувнинг исиши янги рекорд даражага чиқишидан огоҳлантирмоқда.

Олимларнинг маълум қилишича, Ла-Маншда саккизоёқлар сонининг кўпайиши майда моллюскалар популяцияси камайишига таъсир қилиши мумкин. Бундан ташқари, бўғозда сувнинг исиши медуза ва денгиз олабуғалари кўпайишига олиб келади.

Британия Экология, балиқчилик ва аквамаданият илмий маркази биологларининг маълумотларига кўра, Ла-Маншда денгиздаги озиқ-овқат занжирининг асоси ҳисобланган планктонлар сони камаймоқда.