2029 йилда лавозимимни тарк этаман – Тўқаев

2022 йилда сайланган Қозоғистон раҳбарининг ваколат муддати 7 йил ва у сайловолди дастури ва ислоҳотларни амалга ошириш учун бу муддат етарли деб ҳисоблайди.

Фото: Al Jazeera

Қозоғистон президенти Қосим-Жўмарт Тўқаев 2029 йилда президентлик лавозимини тарк этишини айтди.

«2029 йилда лавозимимдан кетишимни аллақачон эълон қилганман. Чунки бу халқимнинг талаби ва ўзимнинг қарорим», деди у Al-Jazeera телеканалига берган интервьюсида.

Тўқаев ҳар қандай президент давлат бошқарувчиси эканига қатъий ишонишини таъкидлади.

«У Худонинг элчиси эмас. У ўз халқи томонидан сайланган давлат бошқарувчиси. Бизда бор-йўғи етти йилга», деди президент.

Давлат раҳбари, шунингдек, ислоҳотлар жараёни жуда узоқ ва барқарор эканини, Қозоғистон ислоҳотлар мамлакати эканини айтди.

«Ислоҳотларимизни давом эттирамиз, узлуксиз олиб борамиз. Ва бунга ҳеч қандай тўсиқ бўлмайди. Менинг эътиқодим шуки, биз Қозоғистон манфаати учун муҳим ислоҳотларни амалга оширишимиз керак», деди у.

2019 йил июнь ойида Қозоғистонда бўлиб ўтган навбатдан ташқари сайловда Қосим-Жўмарт Тўқаев 70 фоиздан кўпроқ овоз олди. «Январь воқеалари»дан сўнг Тўқаев 2022 йил 20 ноябрда бўлиб ўтган навбатдан ташқари президентлик сайловини эълон қилди ва унда 81,31 фоиз овоз олди. Унинг ваколат муддати 2029 йилда якунланади.

Аввалроқ, Тўқаев сайловолди дастури ва ислоҳотларни амалга ошириш учун етти йиллик президентлик муддати етарли эканини айтган эди.

#Қозоғистон #Қосим-Жўмарт Тўқаев #президент ваколати