Эрдўған: Нетаняҳунинг Ғазодаги геноциддан эътиборни чалғитишига йўл қўйиш керак эмас

Президент Ражаб Тоййиб Эрдўған Қатар бош вазири ва ташқи ишлар вазири Муҳаммад бин Абдулраҳмон Ал-Тани билан учрашувда, Исроилнинг Эронга қарши ҳужумлари Ғазодаги геноциддан эътиборни чалғитмаслиги учун саъй-ҳаракатлар давом этади деди.

Туркия раҳбари Истанбул шаҳрида бўлиб ўтадиган Ислом ҳамкорлик ташкилоти Ташқи ишлар вазирлари кенгаши йиғилишида иштирок этиш учун Туркияга ташриф буюрган Ал-Танини қабул қилди, деб хабар берди президент Алоқа бошқармаси.

Учрашувда Туркия ва Қатар ўртасидаги икки томонлама алоқалар билан бир қаторда минтақавий ва глобал масалалар муҳокама қилинди.

Президент Эрдўған Исроилнинг Эронга уюштирган ҳужумларидан сўнг жадал дипломатик фаолият бошланганига диққат қаратиб, минтақа давлатларининг бошқа урушга чидай олмаслигини, Сурия ва Ироқнинг бу тўқнашувга тортилмаслиги муҳимлигини, тарангликни камайтириш ва дипломатия учун майдон очиш зарурлигини таъкидлади.

Исроилнинг ҳаракатларини тўхтатиш ва ядровий келишмовчиликни ҳал қилиш учун музокараларга қайтишнинг муҳимлигини таъкидлаган Эрдўған, бу мақсадларга эришишда айниқса минтақа давлатларининг саъй-ҳаракатлари фойдали бўлишини қайд этди. Шунингдек, у Исроилнинг Эронга қарши ҳужумлари эътиборни Ғазодаги геноциддан чалғитмаслиги учун иш давом этишини ва кучайтирилишини, Исроил бош вазири Бинямин Нетаняҳуга эса бундай имконият берилмаслигини айтди.