Xiaomi компанияси YU7 электр йўлтанламасини тақдим қилди

Олдиндан буюртмалар сонининг кўплиги туфайли компания акциялари қиймати ҳам ошди.

Фото: Xiaomi

Xiaomi компанияси ўзининг иккинчи электромобили - YU7 йўлтанламасини тақдим қилгач, Ҳонгконг биржасидаги акциялари қиймати 8 фоизга ошди. Бунга электромобилга олдиндан берилган буюртмалар сонининг рекорд даражада кўплиги сабаб бўлган, деб ёзди Bloomberg.

26 июн куни Xiaomi ўзининг YU7 электр йўлтанламас автомобилини тақдим этди, унинг нархи 253500 юан (35360 доллар). Бу корпорациянинг Хитой бозоридаги иккинчи электромобили бўлиб, унга ўрнатилган ҳайдовчига ёрдам бериш технологияси ҳам катта қизиқиш уйғотган.

Савдо жараёни очилганидан кейинги биринчи соатда Xiaomi YU7 учун кутилмаганда катта миқдордаги буюртма тушди – қарийб 290 мингта.

Xiaomi YU7 Хитой бозорида Tesla Model Y рақобатчиси деб эълон қилинди. Xiaomi асосчиси Лей Жун тақдимот давомида ушбу икки моделни тўғридан-тўғри таққослади, худди бир вақтлар Mi смартфонларини iPhone билан таққослаганидек.

YU7 нархи Model Y нархидан бироз пастроқ бўлиб, унга истеъмолчилар талаби таҳлилчилар ва бозор кутилмаларидан сезиларли даражада юқори экани таъкидланмоқда. Бу эса Xiaomi компаниясига Хитойнинг премиум автомобил бозоридаги етакчи мавқеини янада мустаҳкамлаш имконини беради.

Март ойида Xiaomi Ҳонгконг биржасида акцияларни жойлаштириш чоғида 5,5 миллиард доллар йиғди. Компания ушбу маблағларни ўзининг электромобил бизнесини ривожлантиришга йўналтиришни режалаштирган. Xiaomi, хусусан, ишлаб чиқаришни кўпайтириш ва Пекиндаги заводини кенгайтириш ниятида.

#Xiaomi #Хитой #электромобил