NYT: Путин Россия армияси яқин ойларда Украина мудофаасини ёриб ўтишига ишонмоқда

Владимир Путин Россия армияси Украина устидан устунликка эришаётгани ва жанг майдонидаги вазият тез орада кескин ўзгариши мумкинлигига ишонади. Доналд Трамп эса сўнгги кунларда Путиннинг муросасизликларига нисбатан норозилик билдираётган бўлсада, охирги ярим йил ичида уни Украинани босиб олиш режасидан воз кечишга ундайдиган ҳеч қандай жиддий чорани кўрмади: Украинага катта ҳарбий ёрдам кўрсатмади, Россияга нисбатан кучли санкциялар жорий этмади ва Москванинг талабларига рози бўлиш йўлидан бормади.

Путиннинг ҳисоблашича, Украина мудофааси яқин ойларда қулайди. Бу ҳақда The New York Times Кремлга яқин икки манбасига таяниб хабар берди. Уларнинг сўзларига кўра, Россия армиясининг ҳужуми жадаллашгани боис Путин айни вақтда Украина томонидан кенг кўламли ён босишларсиз жанговар ҳаракатларни тўхтатиш ҳақида гап ҳам бўлиши мумкин эмаслигига ишонади.

Манбаларнинг таъкидлашича, у Трампнинг сабри тугаши мумкинлигига тайёр бўлган ва ярим йилдан бери давом этаётган ҳаракатсизликдан кейин янги санкциялар жорий этиши мумкинлигини тушунган. Уларнинг сўзларига кўра, Путин Трамп Ғарб ва Россия ўртасидаги уч йиллик сиёсий блокадани бузиб, мулоқот ўрнатганидан мамнун бўлсада, ўзининг асосий мақсади — Украинани таслим этиш учун ушбу муносабатларни ёмонлаштирадиган таваккалчиликка тайёр. Шу билан бирга, газета суҳбатдошларидан бирининг айтишича, Путин қачондир келажакда урушни тўхтатишга тайёр бўлганида, санкцияларни юмшатиш бўйича Трамп билан келишиб олишига умид қилади.

Сўнгги кунларда Трамп Путиннинг позициясидан очиқча норозилик билдира бошлади. Унинг айтишича, Россия етакчиси кўп «сафсата» гапларни гапиради, «у доимо ниҳоятда хушмуомала, аммо буларнинг барчаси охир-оқибат ҳеч қандай маъно касб этмайди», деганди Трамп сешанба куни. У феврал ойидан бери Путин билан олти маротаба телефон орқали суҳбатлашган. Россияга қарши янги санкцияларни жорий этиш имконияти тўғрисидаги саволга эса у «Мен буни кўриб чиқяпман», деган.