Қўшимча функционаллар
-
Тунги кўриниш
Нидерландия суди Россияга чиплар ҳақида маълумот топширилиши иши бўйича ҳукм чиқарди
Россияга микросхемалар ишлаб чиқариш маълумотларини юборгани учун Нидерландияда россиялик уч йилга қамоқ жазосига ҳукм қилинди. Тергов унинг бунинг учун пул олганини исботлай олмади, шунинг учун суд жазони қисқартирди.
Фото: picture alliance
Роттердам суди 43 ёшли россиялик Герман Аксеновни ASML ва NXP компанияларидан микрочиплар ишлаб чиқариш бўйича ички маълумотларни Россияга юборгани учун уч йилга озодликдан маҳрум қилди. Бу ҳақда 10 июл, пайшанба куни Голландиянинг NL Times портали ва Reuters агентлиги хабар берди.
Уларнинг маълумотларига кўра, эркак ASML ва NXP'да муҳандис бўлиб ишлаган. У компанияларнинг ички серверларидан файлларни кўчириб олиб, уларнинг бир қисмини Россияга ўтказган. Бошқалар эса тинтув пайтида топилган USB-тўпловчилар ва қаттиқ дискларда қолган. Шу тариқа у 2014 йилда Европа Иттифоқи томонидан Россияга қарши жорий қилинган санкцияларни бузди.
Россиялик Россия махсус хизматлари билан қандайдир алоқаси борлигини рад этди. Унинг сўзларига кўра, профессионал билимларни сақлаб қолиш учун файлларни ўз эҳтиёжлари учун кўчириб олган. Бу маълумотлар тижорат сири бўлган, деб таъкидлайди AFP ахборот агентлиги.
Тергов Аксенов маълумотларни узатиш учун пул олганини исботлай олмади. Шунинг учун жазо прокуратура сўраган 4,5 йиллик қамоқ жазосидан енгилроқ бўлган.
«Мен ўзимдан бу файлларни Россияга жўнатиш мумкинми, деб сўрамадим. Ҳа, маслаҳатлар берганман», деди айбланувчи судда. AP агентлиги маълумотларига кўра, Аксенов Россияга Signal иловаси орқали маълумотларни жўнатганини тан олган.
