Россия қиймати 40 млрд евродан ошиқ активларни миллийлаштирди

Юристлар хусусий активларни мусодара қилиш ёки Россия Федерациясининг доимий бошқарувига ўтказиш бўйича 102 та ҳолатни ҳисоблаб чиқди, уларнинг деярли барчаси 2022-2025 йилларда содир бўлган. Мусодара қилинган активлар миқдори Россия ҳарбий бюджетининг тахминан учдан бир қисмига тенг.

Фото: AP

Сўнгги йилларда Россия расмийлари мулкдорлардан 3,9 триллион рубл (ёки тахминан 40,4 миллиард евро)лик мулкни мусодара қилган. Бу ҳақда The Moscow Times томонидан ўрганилган «Некторов, Савельев и партнеры» (NSP) юридик фирмасининг июн ойи охирида чоп этилган ҳисоботида айтилади.

Журналистларнинг таъкидлашича, миллийлаштирилган активлар миқдори Россиянинг Украинага қарши урушга йиллик харажатларининг тахминан учдан бир қисмига тенг, бу жорий йилда 13,5 триллион рублни ташкил этади. Шунингдек, у «Роснефт»нинг капиталлашуви (4,3 триллион рубл), йиллик федерал бюджет тақчиллиги (3,8 триллион) ва Миллий фаровонлик жамғармасининг ликвид қисми (2025 йил 1 июл ҳолатига кўра 4,1 триллион) билан таққосланади.

NSP ҳисоботида Россия ва хорижий хусусий мулкдорларнинг активларини миллийлаштиришнинг 102 та ҳолати келтирилган, уларнинг аксарияти 2022-2025 йилларда содир бўлган, бир нечта ҳолатлар 2020-2021 йилларга тегишли.

Шу билан бирга, таҳлилчилар мулкни хатловга олиш учун турли хил воситаларни санаб ўтди. Хорижий компанияларнинг Россия бизнеси халқаро шартномалар билан мусодара қилишдан ҳимояланган, шунинг учун улар Россия президенти Владимир Путиннинг фармонлари асосида Федерал мулкни бошқариш агентлигининг доимий бошқарувига ўтказилади. 2024 йилга келиб бундай компаниялар сони 9 тадан 16 тага кўпайди, дейилади ҳисоботда.

#Россия #активлар